Website papiamento.aw den bachi nobo

March 17, 2022

Website papiamento.aw ta un plataforma esencial pa publica buki, ofrece informacion, herment y recurso di y na Papiamento.

Proyecto Idioma den Enseñansa kier comparti e bon noticia cu comunidad cu e website di papiamento.aw a haya un cara y logo nobo, net na porta di Dia di Himno y Bandera.

Mas cu un decada despues di e lansamento di e website, a bira tempo pa presenta e website den un diseño nobo, moderno, atractivo y mas facil pa e usuario.

E website a wordo lansa na 2008 como parti di un campaña pa crea mas conscientisacion den comunidad tocante Papiamento. Aparte di ta un idioma oficial banda di Hulandes, Papiamento ta e idioma materno di 70% di hende na Aruba y pues e instrumento mas importante di comunicacion di mayoria. E lema di e campaña, ‘Nos idioma ta den bo man. Papiamento, cuid’e!’, tabata refleha e meta di e tempo ey.

Durante e pandemia, manera den mundo henter, e uzo di plataforma digital en general a bira necesario y a haya un urgencia nobo. Como tal e meta di e website a cambia tambe: mas y mas papiamento.aw ta birando un plataforma esencial pa publica buki y ofrece mas informacion, herment y recurso posibel di y na Papiamento. Usuario por click riba ‘Biblioteca’ por ehempel pa lesa buki digital pa mucha y hoben of buki di gramatica, y tambe tin opcion pa click riba ‘Ortografia y Gramatica’ pa haya sa mas tocante e areanan aki.

Por download e Vocabulario Ortografico di Papiamento (Buki Blauw) of busca palabra riba e website mes, cu nan forma di skirbi corecto. Y bishitante di e website por mira un documentario tambe, carga cu hecho tocante e idioma nacional.

Intencion ta pa e website mes bira un herment valioso pa tur esnan cu ta di habla Papiamento of ta simplemente interesa pa haya sa mas di nos idioma. Usuario por keda check pa informacion of buki nobo, pasobra lo keda update e website regularmente.