Universal Children’s Day
20 di November ta un dia importante, riba cual mundo ta conmemora e adopcion di e Declaracion Universal di e Derechonan di Mucha na aña 1959. Esaki ta e fecha tambe riba cual a aproba e Tratado di Derecho di Mucha na aña 1989.
E Tratado aki ta stipula un cantidad di derecho, cu ta inclui aspectonan di salud, enseñansa, recreacion, como tambe e bida familiar, proteccion contra violencia y discriminacion y cada mucha nan derecho pa nan opinion wordo scucha.
Na aña 2001 Aruba tambe a firma e Tratado aki, haciendo asina e compromiso pa proteha di un forma mas completo posibel e desaroyo di e mucha den su personalidad, talento, capacidad emocional, mental y fisico.
E fecha aki ta wordo celebra den paisnan den forma di actividad, sinembargo ta bon pa tuma e momento aki pa mas bien refleha riba e con leu Aruba ta cu e implementacion di e derechonan di mucha aki na Aruba.
Tin varios desaroyonan positivo cu a tuma luga caba, pero ainda tin espacio pa hopi mehoracion. E compromiso pa sigui cu e ambicion pa tur mucha por disfruta di tur nan derechonan t’ey. Comision Derecho di Mucha tin e tarea pa sigui e desaroyonan aki y tambe raporta esakinan.
Comision Derecho di Mucha ta invita tur educador y docente pa usa e siman cu ta bin pa trese mas conscientisacion riba e tema cerca e muchanan tocante nan derechonan: [Mi derecho]
Comsion Derecho di Mucha
Na aña 2001 Aruba tambe a firma e Tratado di Derecho di Mucha. Pa percura cu e cumplimento cu e Tratado ta sosode na un forma coordina y eficiente, Gobierno di Aruba a instala e Comision Derecho di Mucha riba 12 di april 2001. E comision tabata activo te cu aña 2009. Na luna di oktober 2014 e Comision di Derecho di Mucha a keda reinstala cu tres tarea specifico:
- Conseha gobierno riba implementacion di e Tratado
- Ehecucion di e responsabilidad internacional paraportaencuanto e Tratado
- Concientisa e comunidad tocante e Derechonan di mucha
E Comision Derecho di Mucha lo ta presidi dor di Departamento di Asunto Social y ta consisti di representacion di Directie Buitenlandse Betrekkingen, Directie Voogdijraad, Bureau Sostene Mi, Departamento di Enseñansa, Departamento di Salud Publico, Departamento di Labor, Oficina Central di Estadistica, Asociacion di Trabao di Hubentud y CEDE Aruba.
E comision a traha riba e raportahe internacional cu a ser trata na juni 2015 na Geneve.
Lansamento di website
Cu e ciclo di raportahe tras di lomba e comision a enfoca siguientemente riba e dos otro tareanan, esta pa conseha gobierno riba e implementacion y concientisa e comunidad.
E Tratado Derecho di Mucha ta consisiti di 54 articulo cu ta cubri diferente area, entre otro salubridad, enseñansay husticia. Pa duna un ehempel, art. 29-30 ta stipula cu e derecho riba enseñansa tambe ta consisti e derecho pa desaroya e personalidad, talento y abilidad mental y fisico di e mucha, manteniendo bista riba e derechonan humano general y respet pa e.o. nan identidad, idioma y religion. Tur esaki tambe pa prepara e mucha pa por biba un bida responsabel den un sociedad liber.
Pa por duna informacion na nos comunidad encuanto e Tratado na un manera mas efectivo, e Comision a lansa recientemente e website: [derechodimucha.org]
Riba e website por haya tur informacion tocante e articulonan den e Tratado na tres diferente idioma, Papiamento, Hulandes y Ingles. Por lesa tambe e raportahenan na Nacionnan Uni y e recomendacionnan cu Aruba a ricibi. Cu e lansamento di website e comision ta spera di por a haci e acceso mas facil pa tur hende.
Info / Contact
Pa mas informacion: [derechodimucha.org]
Scroll To Top
