Trayectorio extensivo pa implementacion di un Functiehuis nobo
Sector di Enseñansa di Aruba ta scoge pa un “aanpak” innovativo. Implementacion di un structura di salario y “Functiehuis” nobo lo bira un hecho despues di trayectorio extensivo.
Na aña 2012 e Minister di Enseñansa anterior, Minister Dowers, a duna encargo pa desaroya un “Functiehuis” y un structura di salario nobo pa e sector di enseñansa na Aruba.
Durante e añanan 2012-2013 diferente stakeholder di e sector di enseñansa a participa na e trayecto aki cu a conduci na un “Functiehuis” actualisa cu descripcion di funcion nobo (functiebeschrijvingen), evaluacion di funcion corecto (functiewaarderingen) y un structura di salario nobo.
Despues di diferente contratiempo, e Minister di Enseñansa actual Minister Hooyboer-Winklaar a reactiva e proyecto na 2015 dunando encargo pa finalisa e trabounan necesario pa por implementa e “Functiehuis y Salarisstructuur” nobo. E proceso di implementacion, cual ta uno extenso y complica, ta den man di un “projectteam” forma pa Ministerio di Enseñansa y Departamento di Enseñansa, cu sosten di KPMG y Balance Consultancy.
Desaroyonan social a trece cambionan riba e tereno di enseñansa y ta haci cu nos comunidad ta rekeri otro tareanan y responsabilidad nan di nos maestronan y empleadonan cu esunnan stipula actualmente den nos decreto gubernamental tocante sueldo di empleadonan den e sector di enseñansa. Tambe pa hopi tempo caba tin un necesidad grandi di parti di maestronan y esunnan den directivanan di scol pa por tin mas uniformidad den tur nivel di enseñansa, transparencia den e reparticion di tarea y un evaluacion husto, cu ta cuadra cu e peso di e funcion den enseñansa primario.
Ora cu e implementacion di e asina yama “functiebeschrijvingen” y “salarisstructuur”, esta descripcion di funcion y structura nobo di salario pa tur scol y tur directiva di scol na Aruba, keda realisa esaki lo tin mas oportunidad pa tur empleado envolvi den enseñansa crece den nan carera. Alabes directivanan di scol lo haya un instrumento den nan organisacion cu cual nan lo por controla y maneha mas eficientemente. Tur esaki ta un aspecto necesario pa por sigura innovacion ariba e area di enseñansa di Aruba.
Preparacion
Desde fin di 2015 Directivanan di scolnan subsidia, incluyendo Dienst Publieke Scholen (DPS), Sindicatonan, Departamento Recurso Humano (DRH) y otro instancianan gubernamental ta envolvi di cerca den e proceso di preparacion y ta yuda pensa den forma constructivo pa por logra e cambionan di un forma mas agradabel posibel. Un comision di revision independiente lo tin como tarea pa monitor si e cambionan ta bayendo segun e proceduranan y liñanan di guia acorda.
Tin sesionnan andando ainda cu e directivanan di scol pa finalisacion di e ultimo puntonan pa cu preparacion pa e implementacion y pa asina e directivanan di scol por sinta cu nan personal pa duna informacion detaya y contesta tur pregunta cu e trahadonan por tin.
Mas informacion
Pa brinda informacion di e proyecto aki, Departamento di Enseñansa a crea un pagina special riba su website: www.ea.aw/functiehuis. Aki por haya informacion general como tambe algun documento manera “Rapport Gesubsidieerde Onderwijssector – De functiebeschrijvingen en functiewaarderingen voor het onderwijs op Aruba” y “Migratieprotocol implementatie functiehuis onderwijs”. Posiblemente e documentonan aki lo por tin ahustacion den futuro mirando cu ta documentonan cu ta sigui desaroya.
Hunto cu esaki lo introduci un pagina di “Pregunta y Contesta” (FAQ) na unda tur esunnan emplea den e sector di enseñansa por haya contesta riba e preguntanan mas haci, manera “Mi por bay atras den salario?” of “Mi por spera un aumento di salario?“.
A traves di Noticiero Enseñansa Aruba, un boletin informativo digital, lo manda informacion regularmente. Pa ricibi esaki por registra via website ea.aw.
Pa mas informacion por busca Functiehuis (bou letter F) den e alfabet menu of conecta cu Departamento di Enseñansa Aruba riba Facebook facebook.com/educationaruba pa keda na altura di tur informacion.
Info / Contact
Pa mas informacion por busca den e alfabet menu riba homepage:
Por tuma contacto cu:
Scroll To Top
