Training profesional na docentenan di MdC
Pa duna sosten na e personal di e Observatiecentrum MdC den nan trabou diario, a organisa e training “Safety-Care Core Specialist Training” y “School Age Children Advanced Module” di e compania QBS Inc. di Merca. Trainer di ambos programa ta Erin Devine.
Observatiecentrum
E observatiecentrum di Multidisciplinair Centrum (MdC) a habri na aña 2015 cu e meta pa yuda muchanan cu no por funciona den enseñansa regular pa motibo di problema (grave) di comportacion y/of psikiatrico. E centro actualmente tin 1 kleuterklas, 1 eerste y 1 tweede klas. Den cada klas tin maximo 8 alumno.
Mainta e muchanan ta haya enseñansa (setting di scol) y despues di scol nan ta haya cuido y guia te atardi dor di profesionalnan cu ta ofrece nan un programa special (setting di opvang).
Na Observatiecentrum ta traha 19 persona: e maestronan y nan assistentnan, un Interne Begeleider, un trahado social, un terapista di musica y un di movecion, un psycholoog, un logopedista part-time y lidernan y assistent lidernan pa e opvang despues di merdia.
Safety-Care Core Specialist Training
Den e training di Safety Care e trahadonan ta siña anda na un manera respetuoso, safe y terapeutico cu muchanan cu no por regula nan emocion y ta bira agresivo.
E proceduranan den Safety Care ta cientificamente investiga y ta basa riba evidencia. E trahadonan ta siña habilidadnan pa interveni na un manera profesional y terapeutico, uzando un acercamento directo y efectivo pa preveni, minimalisa y maneha escalacion di comportacion agresivo. Esaki tanto pa proteccion di e mucha mes como di e profesional/adulto.
School Age Children Advanced Module
E “School Age Children Advanced Module” ta duna e trahadornan herment pa anda specificamente den un setting di scol cu muchanan chikito cu ta demostra comportacion agresivo y peligroso. E trahadonan ta siña ki proceduranan ta adecua pa uza cu muchanan chikito. Tur scenario cu por presenta.
Cu e profesionalisacion aki e trahadonan di e Observatiecentrum ta miho ekipa pa tur scenario cu por presenta.
Sosten pa personal
Interim Manager di Centro di Observacion di Bureau Multidisciplinair Centrum, Indira Falconi a splica cu ta dunando e empleadonan un training di dos siman cu meta di duna e personal sosten.
“Sosten pasobra cu nan ta traha cu muchanan cu no por regula nan emocion y ta bira hopi agresivo. Nan ta siñando kico pa haci ora tin incidentenan — e “Safety Care” — ta siña con pa anda na un manera respetuoso, positivo y afectivo pa e muchanan siña maneha y controla nan emocion of e comportacion agresivo,” el a elabora.
Falconi ta amplia bisando cu na e Centro di Observacion tin un kleuterklas, un eerste y un tweede klas cu ta e categoria di edad di cuater te cu 10 aña. Cada klas tin ocho mucha y bo ta pensa cu esaki ta bay ta hopi facil pero tur e muchanan aki tin problema of psikiatrico of problema cu regula nan emocion.
“Despues di e training ta sigui cu un ‘case counseling’ riba dialuna cu diamars. Aki e trainer ta bay guia nos na un manera adecua con pa atende un situacion di crisis of un incidente riba e manera teurapeutico y adecua”, Falconi a bisa.
“Hunto cu esaki dos colega di e team, e psicologo y unit manager lo bay hunto cu e trainer di Merca, Erin Divine, den tur e klasnan y ta scoge dos caso pa wak kico por ta e alternativanan pa e edificio y pa e muchanan pa de-escala e incidentenan,” el a agrega.
E Interim Manager ta bisa cu pa awor e training aki ta pa e centro so, “pero ta haya cu realmente e ta recomendabel pa tur otro scolnan y barionan na Aruba. Hopi mayor y scolnan ta puntra con pa anda cu e mucha pasobra den un klas cu 30 mucha si un of dos di nan bira agresivo y abo como maestra ta duna les y bo no por duna les y mester bay atende. E training aki ta duna e hermentnan cu tin mester pa tipo di incidentenan asina.”
Muchanan special
Board Certified Behavioral Analyst, Erin Divine a splica cu su meta ta pa siña e empleadonan tocante ‘Safety Care’ ora ta traha cu muchanan special. “Muchanan cu no ta siña manera un mucha tipico. Asina ta nan mester hermentnan riba con pa reenforsa comportacion bon, apropia y deseabel y con pa maneha como tambe con pa maneha y preveni situacionnan peligroso cu nan por haya nan mes confronta cune.”
Divine a splica cu e prome siman nan ta haya tur e parti teoretico sigui pa training den veld. “Lo mi traha cu e empleadonan y dos di e studiantenan cu mas reto di comportacion y asina eherce loke cu nan a siña.”
E experto riba e tereno a bisa cu te cu awor tur cos ta bayendo hopi bon. Un di e puntonan cu el a remarca ta cu despues di e training e feedback cu el a haya ta cu te cu awor e empleadonan tabata manehando e situacionnan na un manera diferente y cu desde cu nan a cuminsa uza loke cu nan a siña e resultadonan ta hopi mas positivo.
“Nan lo mester por sigui aplica e procedura nobo cu nan a siña y mester por corda cu e muchanan ta studiante y cu nan tambe ta siñando, nan no ta perfecto y tin biaha e por ta frustrante cu e muchanan aki, pero awor nan tin un curriculum cu nan por apoya ariba ora cosnan bira duro,” Erin Divine a bisa.
Info / Contact
Pa mas informacion por busca den e alfabet menu riba homepage:
Scroll To Top
