Training Kerndoelen Rekenen & Wiskunde plus
Ministerio di Enseñansa hunto cu Departamento di Enseñansa a ofrece Maestronan di scol basico training den cuadro di e asina yama “Kerndoelen Project”.
 |
Durante aña escolar 2015-216 a introduci Kerndoelen (metanan nucleo) specificamente pa cu e “vormingsgebied” di Rekenen y Wiskunde, concretisa den e asina yama kerndoelenwerkdocument. E documento aki ta consisti di kerndoelen, einddoelen y tussendoelen pa scol preparatorio y basico.
E werkdocument ta un instrumento cu ta pone tur scol basico riba e mesun liña pa cu e rekisitonan di topico y conocemento minimo cu e alumno mester a wordo ofreci den cada klas pa cu su preparacion pa su ingreso na un scol secundario. E ta un documento oficial cu tur klas y scol mester cumpli cu ne y ta pone tur scol na e mesun nivel minimo pa cu e materialnan y topiconan cu ta wordo ofreci na e alumno.
E mesun compania cu a haci e implementacion na aña 2015, ta actualmente na Aruba un biaha mas pa conhuntamente cu Ministerio y Departamento di Enseñansa train e maestronan riba e diferente aspectonan pa por introduci esaki, bay mas den profundidad, refresca e memoria y yuda surpasa cualkier obstaculo cu e maestronan por tin.
 |
Minister Hooyboer-Winklaar a agrega cu ta introduci esaki tambe na nos scolnan special cu tin diferente meta compara cu scolnan basico regular. Esaki ta basa riba e vision cu scolnan special tin e mesun importancia cu scolnan regular y cu kier saca lo maximo for di cada alumno.
Minister Hooyboer-Winklaar a indica cu lo sigui traha riba e profesionalisacion di e maestronan. Lo yuda nan reenforza nan ‘skills’ den transcurso di aña.
 |
Scolnan Basico trahando riba un linea
Durante e sesionnan di training teni recientemente, e maestronan di e Scolnan Basico a duna di conoce cu nan ta hopi entusiasma cu e implementacion di e “Kerndoelen”, caminda kier pa tur scol ta riba un mesun linea pa loke ta e vaknan di Rekenen y Wiskunde.
Un di e docentenan cu a participa den e workshop tabata Juffrouw Germaine Tromp-Maduro di Colegio San Hose. El a señala cu aña pasa e maestronan a haya un introduccion di e “Kerndoelen” y e aña aki ta bay un tiki mas amplio. Tabata un bon oportunidad pa intercambia informacion, puntonan di bista y a siña wak e cosnan di otro manera ademas di hinca bo mes den e sapato di e mucha, a bisa.
Juffrouw Ivirgna Hernandez ta docente na Maria Goretti College a duna di conoce cu e biaha aki a compara e metodo cu nan ta usando cu e “Kerndoelen”. Nan mester a saca afo si e ta suficiente of si e ta menos. “Nos ta haya tips tambe cu nos por usa den onderwijs y cu por usa na un forma mas atractivo pa e mucha“, a señala.
Juffrouw Mayens di Commandeur Pieterboer School tambe a expresa su punto di bista relaciona cu e training aki. El a bisa cu Rekenen ta un vak unda tempo ta hunga un rol. Aworaki ta bay focus riba kico ta bayendo bon, kico no y pone enfasis riba tur. Mester wak unda e mucha ta haci su fout y mustr’e pero banda di esey mustre con mester ta. E bon di esaki ta cu awor por mustra riba e fout pero traha riba dje. E ora ey e mucha ta compronde mas mihor, Juffrouw Mayens a subraya. E aspecto di material tambe el a trece dilanti. Ta importante pa e mucha e uso di materialnan pa ilustra y pa asina e mucha por compronde mihor. E mucha no ta lubida si ta usa material pa yuda nan compronde matematica, a indica.
Finalmente, Juffrouw Mayens a laga sa cu e ta hopi satisfecho cu e training aki y e ta kere cu mester bin cune mas biaha. No solamente traha riba Rekenen so pero riba otro vaknan tambe. Cu esaki tur scol ta keda riba e mesun linea, “esey mi ta haya hopi importante“.
 |
 |
 |
 |
 |
 |
 |
Info | Contact
Pa mas informacion por busca den e alfabet menu riba homepage: [L] Luna di Enseñansa of [K] Kerndoelen of por tuma contacto cu: Departamento di Enseñansa Aruba | Ministerio di Enseñansa
Scroll To Top
