Trahando na diferente aspecto pa nos studiantenan na Hulanda
Minister di Enseñansa (Endy Croes) a elabora riba e situacion di e studiantenan na Hulanda y con ta trahando pa mehora cada aspecto di esaki.
Huisvesting
Desde aña pasa el a inicia cu un programa special pa e studiantenan cu ta ta bay Hulanda. A organisa un anochi di informacion en conexion cu vivienda pa e alumnonan di examenklas di Colegio Arubano, Colegio Nigel Matthew y Educacion Profesional Intermedio (E.P.I.) na The Movies IMAX na Gloria. Durante e anochi di informacion aki tambe a informa e alumnonan tocante maneho di presupuesto.
Na Aruba tabatin e custumber di aplica pa vivienda na Hulanda algun luna prome. Ta necesario pa e studiantenan aplica minimo un aña prome. Nos ta haci peticion na e studiantenan pa e aña aki cuminsa aplica pa vivienda dos aña prome. Tin un webpage (Studia na Hulanda) unda e studiantenan por haya informacion di vivienda na diferente ciudad di Hulanda. Di e forma aki e studiantenan ta bon informa y por aplica trempan pa bin na remarke.
Rapport
Nationale Ombudsman Den Haag a produci un rapport hopi amplio di 86 pagina bou di e nomber Kopzorgen van Caribische Studenten (Dolor di cabes di studiantenan Caribense), unda un total di 624 studiante a participa den e investigacion aki. A base di e resultado di investigacion a bin dilanti diferente problema cu e studiantenan ta enfrenta durante nan estudio na Hulanda.
Ta trahando riba e aspectonan aki.
BSN
Na april ultimo, nos tabata na Corsou hunto cu Minister President di Corsou Gilmar ‘Pik’ Pisas y Minister di Enseñansa di Hulanda Robbert Dijkgraaf pa otorga e prome studiante afo di Hulanda un BSN nummer. Antes a studiantenan tin cu warda alrededor di seis (6) siman pa haya un BSN nummer y esaki tabata complica nan proceso aya. Desde aña 2024 en adelante, e studiantenan di Caribe lo ricibi nan BSN nummer prome cu nan biaha pa Hulanda. Esaki lo wordo coordina y regla via Dienst Uitvoering Onderwijs (DUO). DUO ta den preparacion pa amplia su servicio desde aña 2024 pa por brinda e servicio adicional aki. Pues desde aña 2024 en adelante, e studiantenan por aplica desde Aruba pa nan BSN nummer y asina por logra biaha cu nan BSN nummer den man, cual lo facilita nan ora nan yega Hulanda.
Arubahuis
Ademas di esaki, directora di Arubahuis Sra. Joselin Croes y Minister Plenipontenciario na Hulanda Sr. Ady Thijsen a inicia cu un proyecto “Ban Topa pa nos studiantenan”. E meta di e proyecto aki ta pa topa cu nos studiantenan na Hulanda y scucha nan preocupacionnan. E problema ta desemboca mas tanto riba e free movers. Esaki ta e studiantenan cu no a termina scol secundario y a dicidi di bay biba na Hulanda riba nan mes. No tin control riba e grupo aki. Banda di esaki, tin contacto cu e mentornan na Hulanda pa evalua e situacion di nos sudiantenan ayanan. A base di e inkietud- y preguntanan cu nan a ricibi di e studiantenan, directora di Arubahuis Sra. Joselin Croes y Minister Plenipontenciario na Hulanda Sr. Ady Thijsen a desaroya un manual (handleiding), unda ta duna instruccion pa guia e studiantenan durante nan estudio na Hulanda. Pues ta trahando pa mehora diferente aspecto pa nos studiantenan na Hulanda. Nos ta sigui traha y percura pa e bienestar di nos studiantenan.
Mensahe na mentoren y miembronan di POC
Minister di Enseñansa (Croes) a dirigi palabra na e mentor- y miembronan di e Plaatselijke Opvangcommissie (POC) di Kabinet di Aruba. Na e mentornan: John, Garlon, Nathaly, Reina, Rasnaly, Solange, Shahaira y Yuraima desde cu boso a ricibi den luna di mei ultimo e prome lista cu nomber di e studiantenan cu lo continua cu nan estudio avansa na Hulanda e aña aki, boso ta trahando incansablemente pa nan yegada. Hopi pregunta a wordo contesta y hopi conseho a ser duna. Boso a tuma contacto cu Gemeente pa facilita e inscripcion y a haci e citanan necesario cu DUO. Ademas di esaki, a regla hotel pa asina e studiantenan cu ta yegando dia 5 y 6 di augustus proximo por hospeda. Boso a inverti hopi ora di trabou pa prepara lo miho posibel prome cu e studiantenan yega Hulanda. Tur boso esfueso, sacrificio y trabou eherece ta wordo inmensamente balora y hopi aprecia.
Na e ouderejaars studenten cu ta forma parti di e POC di nan respectivo ciudad di estudio en bes di bay gosa di vakantie, boso a scoge pa hinca boso tempo y energia hunto cu boso mentor pa traha un bunita programa pa e studiantenan cu ta yegando Hulanda. Cu yen di energia y entusiasmo boso a yuda cu e programa, unda cu a presenta ideanan moderno. Boso ta preparando pa yuda e studiantenan conoce e ciudad, unda cu nan ta bay biba y studia na e miho forma posibel. Boso ta yuda masha hopi pa acomoda nos studiantenan nobo den tur aspecto. Masha danki pa tur boso esfuerso y e bunita trabou cu boso ta haciendo. Mi ta gradici boso pa boso excelente trabou, disciplina, dedicacion y determinacion pa laga nos studiantenan sinti nan mes na cas na nan yegada na Hulanda. Na crioyo bisa: na nan cas leu for di nan cas Aruba. Palabra di gratitud y danki for di profundidad di mi curason na cada un di boso. Masha danki! “Keep up the great job”.
