Tayer “Autismo den klas” pa educador
Den cuadro di luna internacional di conscientisacion di autismo, Ministerio di Enseñansa hunto cu Fundacion Autismo Aruba (FAA) ta organisa e tayer “Autismo den klas” pa actornan den enseñansa.
Autismo y enseñansa
Autismo of e spectrum di desorden autistico (Autisme Spectrum Stoornis) ta un reto grandi pa alumnonan escolar, pero tambe pa e docentenan.
Un alumno cu tin autismo ta procesa informacion na un manera diferente cu un alumno cu no tin autismo. E ta comunica na un manera diferente y e tin dificultad cu interaccion social y pa cera relacion cu otro mucha di su edad. Pa e mucha aki ta dificil pa adapta na cambionan, na situacionnan imprevisto y no planea, loke por haci’e dificil pe pa e funciona den klas y na scol.
Esaki ta algun caracteristica di autismo. Mucha y personanan autista, sin importa e intensidad di e desorden neurologico, ta funciona miho ora e ambiente ta hopi structura.
Desde su inicio Fundacion Autismo Aruba ta traha duro pa crea conscientisacion y pa logra cu muchanan bibando cu autismo haya e mesun oportunidadnan den bida cu tur otro mucha. Tambe den enseñansa.
Tayer
Ministerio di Enseñansa bou maneho di Minister Hooyboer-Winklaar a reconoce e necesidad pa yuda maestronan y tur otro partner envolvi haña e herment necesario pa sigura y eleva e calidad di enseñansa y cuido cu muchanan bibando cu autismo tin derecho di ricibi. Pa e motibo ey a partner cu Fundacion Autismo Aruba y a hasi’e posibel cu e siman aki lo tin un tayer duna pa dos “Board Certified Behavioral Analysts” di Merca.
E tayer lo ta uno intensivo riba autismo en general como tambe e comportacion cu autismo ta bin cune. Durante e tayer lo splica con pa anda cu e mucha autista den ambiente di klas y na scol.
Tur scol lo ricibi e autsim toolkit cu Ministerio di Enseñansa a laga traduci na Hulandes y cu sigur lo ta un herment hopi practico pa maestronan y otro profesionalnan den enseñansa uza den nan trabou diario.
E prome dos dianan e tayer lo ta pa tur maestro di Enseñansa Special na Aruba, hunto cu e team di profesional di Multidisciplinair Centrum (MdC), e trahadonan social di tur directiva di scol y tambe e docentenan di Instituto Pedagogico Arubano (IPA).
Despues ta sigui cu dos dia mas di tayer pa e maestronan di Enseñansa Primario, esta di tur scol preparatorio y basico na Aruba.
Nos por a tuma nota cu e entusiasmo den veld ta grandi y e cuponan a yena mes ora. Pa e motibo ey a dicidi cu lo bolbe haci un tayer pa resto di veld na luna di october.
Minister di Enseñansa ta gradici Fundacion Autismo Aruba pa e trabou importante cu nan ta desplega cu hopi dedicacion y ta desea tur participante hopi exito cu e tayer “Autismo den klas“.
Info / Contact
Pa mas informacion por tuma contacto cu:
Tambe por busca den e alfabet menu riba homepage:
Scroll To Top
