Studiantenan a haya charla riba entreprenuership
Den Haag – Recientemente un grupo di studiante di Aruba na Hulanda a atende un anochi riba entreprenuership na Utrecht.
 |
| Potretnan cortesia di Gabinete di Minister Plenipotenciario di Aruba |
E anochi inspirativo y informativo aki tabata un initiativa di Minister Plenipotenciario Juan David Yrausquin pa stimula studiantenan pa pensa den e direccion di lanta nan mesun negoshi despues di nan estudio. Esaki tambe tabata e mensahe cla cu e mandatario a bisa durante di su discurso.
“Ta hopi comun pa pensa riba un trabao despues cu boso caba boso estudio. Pero un opcion real tambe ta pa mira si boso por haci uso di boso talento pa cuminsa cu un negoshi. Aruba por ta chikito, pero tin hopi potencial pa entrepreneurs. Y esaki ta nos meta awe nochi pa duna boso guia den esaki. Mi ta spera e informacion awe nochi pone boso pensa den e alternativa pa ta doño enbes di trahador,” asina Minister Yrausquin a bisa.
Banda di Minister Yrausquin e programa a conta cu oradornan cu expertisio riba e tereno di entrepreneurship. Hein Roelfsema cu ta Director di Centre for Entrepreneurs Utrecht a tene un workshop hopi interactivo na unda e studiantenan mester a bin cu pensamentonan riba loke ta e rekesitonan pa habri un negoshi.
Den su workshop Roelfsema cuminsa na bisa cu bo mester constata un problema, pa despues bo haci un analisis di un persona cu ta enfrenta e problema aki. Siguientemente bo mester busca cifra pa sa cuanto personan mas ta enfrenta e mesun problema aki y asina bo por haci un calculacion di kico bo entrada por bira na momento cu bo cuminsa cu bo un negoshi pa enfrenta e problema aki. Por a nota cu durante di e workshop, hopi studiante a bin cu ideanan y plannan hopi bon y concreto cu sigur tin potencia pa futuro.
 |
Na final di e programa Hans Biesheuvel di ONL a tene un charla riba entrepreneurship. Akinan sr. Biesheuvel no solamente a duna informacion y hopi tips pa esnan cu ta pensa pa cuminsa cu nan mesun negoshi, pero a ilustra esaki tambe for di su mes un experencia. Ela cuminsa na un edad hoben den e negoshi di su tata, pa despues e cuminsa pa su mes y asina bira un comerciante exitoso na Hulanda.
Sr. Biesheuvel ta hopi conoci cu economia di Aruba y a menciona algun aspectonan positivo manera e operacion di TNO for di Aruba pa e region di Caribe. Tambe ela aplaudi cu e instituto Qredits a habri un filial na Aruba pa brinda micro financiamento na Arubianonan cu kier habri un negoshi of cu ya caba tin un negoshi. Segun sr. Biesheuvel Qredits ta un fundacion cu no ta tras di ganashi, pero tei unicamente pa yuda negoshinan chikito cu financiamento y asistencia pa run nan negoshi.
Hopi di e studiantenan a expresa na final di e anochi nan satisfaccion cu un anochi asina a keda organisa, unda nan por a haya informacion for di expertonan na Hulanda cu sigur lo yudanan pensa den e direccion pa un dia nan lanta nan mesun negoshi.
Info | Contact
Pa mas informacion por busca den e alfabet menu riba homepage: [Studia na Hulanda] of por tuma contacto cu: [Kabinet van de Gevolmachtigde Minister van Aruba – Arubahuis]
Scroll To Top
