Studiantenan a completa Fall Minor na IPA
Studiantenan internacional di Caribe, Latino America, Merca y Europa por a participa na e Fall Minor Globalization, Diversity and Multilingualism cu IPA a ofrece durante e periodo di september 2019 te cu januari 2020.
“Un experiencia inolvidabel. Berdaderamente nos a siña conoce Aruba den e cinco lunanan cu nos a sigui nos minor. Tabata hopi dificil pa mi a tuma despedida di mi alumnonan na mi scol di practica. Sigur lo mi regresa Aruba pronto.”
“Un programa varia cu entre otro baile, idioma y historia di Aruba. Hopi excursion fascinante: core cabay, rutanan alternativo pa Hooiberg, hiking den Rooi Fluit y snorkel anochi na Mangel Halto”. Banda di e parti di educacion un tesoro di experiencia pa hiba bek Hulanda”.
Esaki ta algun expresion di e studiantenan di Hulanda cu a participa na e Fall Minor Globalization, Diversity and Multilingualism ofreci pa IPA.
Cu hopi entusiasmo y motivacion e studiantenan Fleur Meijer, Rianne Hommes, Bobby- Joy Kroon, Naomi Muller di Haagsche Hogeschool y Sophia Boulassouak, Danielle de Klein, Kristine Trimon y Heidi Aristizabal Rianos di Hogeschool Rotterdam a participa y a termina e programa cu exito.
E programa di International Fall Minor tabata enfoca riba Globalisacion, Diversidad, Multilingualismo y Enseñansa. Tambe tabatin un enfoke grandi riba desaroyo sostenibel delinea den e asina yama cinco P’s di sostenibilidad cual ta ‘Planet, People, Prosperity, Participatory Governance y Peace’. E meta tabata pa e studiantenan amplia nan horizonte, cera conoci cu e cultura y sistema di enseñansa di Aruba y haya conocemento didactico pedagogico, investigacion y tambe intercambia conocemento y experiencia.
E programa tabata consisti di diferente actividad multidisciplinario unda e studiantenan a participa na un serie di tayer, facilita pa varios docente di IPA y experto invita, riba diferente tereno manera: globalizacion, creolisacion, diversidad, arte y cultura, multilingualismo den enseñansa, sistema y maneho di enseñansa, investigacion y ciudadania. Nan a haci nan practica na diferente scol basico y scol secundario na Aruba. Tambe nan a haci trabao boluntario y participa na diferente excursion rond di nos isla na entre otro San Nicolas, Oranjestad, Hooiberg y Parke Arikok.
Pa finalisa nan programa e studiantenan a presenta e resultado final di nan investigacion y nan experiencia en general. Nan a termina e programa cu un evaluacion oral exitoso pa cua nan a ricibi un certificado. E studiantenan a experiencia IPA y nan scol di practica como uno sumamento educativo, informativo y creativo. Nan a duna di conoce cu nan pasantia na Aruba tabata uno rico na experiencia. IPA ta desea e studiantenan un bon continuacion y finalisacion di nan estudio na Hulanda.
Info / Contact
Pa mas informacion por busca [I] Instituto Pedagogico Arubano (IPA) den e alfabet menu riba homepage of por tuma contacto cu IPA
Scroll To Top
