Scolnan por habri entrante 20 di Augustus
Durante e Conferencia di Prensa di Gobierno di Aruba di diaranson dia 12 di augustus 2020 a anuncia cu scolnan na Aruba por habri entrante diahuebs 20 di augustus proximo.
Esaki a wordo anuncia pa sra. Glenda Hernandez, director di Departamento di Asuntonan Social, kende alabes ta encabesa e “cluster” bou di cual enseñansa ta cay, esta “cluster 4” di e “Crisis Team”.
Directiva di Scol y sindicato
Hernandez a informa cu dialuna ultimo a tuma luga un encuentro cu e Directivanan di Scol. Den e encuentro aki a puntra cada directiva ki dia y con nan lo habri scol, ki preparacionnan ta tumando luga. A base di esaki a conclui cu mayoria kier habri entre 20 pa 24 di augustus.
Diamars proximo ta papia cu SIMAR y SEPPA riba e mesun puntonan pa wak di nan punto di bista kico mester mehora pa haci e apertura escolar aki mas exitoso posibel.
Protocol
E protocol “Randvoorwaarden openstellen onderwijsinstellingen m.b.t preventieve maatregelen COVID-19” compila pa Directie Volksgezondheid Aruba, fecha 12 di augustus 2020 ta publica riba e website oficial di Gobierno di Aruba y e Crisis Team relaciona cu e Coronavirus COVID-19:
Medidanan di prevencion
Scolnan primario
- Distanciamento fisico no ta rekeri entre e alumnonan, ni entre alumno y maestro;
- Distanciamento fisico di 1.5 meter si ta rekeri entre e maestronan mes como adulto;
- Mondkapjes no ta obligatorio pa e alumnonan di kleuter y basis;
- Mondkapjes ta rekeri pa e maestronan ora di interaccion entre nan como adulto.
Scolnan secundario
- Distanciamento fisico no ta rekeri entre e alumnonan;
- Distanciamento fisico di 1.5 meter si ta rekeri entre alumno y maestro/docente;
- Mondkapjes ta obligatorio pa alumno, maestro/docente y staf na scol.
Scolnan di avondonderwijs
- Distanciamento fisico di 1.5 meter ta rekeri entre alumno, maestro/docente y staf na scol;
- Mondkapjes ta obligatorio pa alumno, maestro/docente y staf na scol.
Mayornan
- Distanciamento fisico di 1.5 meter ta rekeri pa tur mayor na tur tipo di scol;
- Ta pidi pa un (1) mayor so hiba y busca e alumno na scol;
- Den caso cu e yiu ta malo of tin infeccion di COVID-19 na cas, mester meld e mucha malo.
Por wak e conferencia di prensa di 12 di augustus aki (Sra. Hernandez ta cuminsa na minuut 28:00):
Enseñansa online
Minister di Enseñansa, Ciencia y Desaroyo Sostenibel, sr. Armando Lampe, a elabora riba e decision aki durante un Conferencia di Prensa diahuebs 13 di augustus. Segun e minister, e protocol di DVG ta señala cu si mayornan dicidi cu nan yiu no ta bay scol pa cualkier motibo, esey ta posibel. Tambe maestronan cu ta den e grupo di risico, mester informa e cabesante di scol y mester busca forma pa desde cas por cumpli cu nan trabou. “Esey ta e realidad nobo cu ta biba cu ne: home schooling y home office”, Minister Lampe a bisa.
Bureau Leerplicht conoce su maneho, unda cu e muchanan tin derecho riba enseñansa pero por ricibi esaki tambe pafo di scol. Door di e situacion actual mas mayor ta opta pa les online.
Segun e mandatario, ta habri diferente posibilidad pa enseñansa online, tanto pa enseñansa primario como enseñansa secundario. Esnan cu ta interesa por manda un email na info@educampuslearning.org pa mas informacion.
Por wak e conferencia di prensa di 13 di augustus aki:
