Scol Basico Xander Bogaerts cu Carousel di informacion pa Mayor

December 9, 2021

Diaranson dia 8 di december 2021, e Minister encarga cu Enseñansa (Croes) a bishita Scol Basico Xander Bogaerts na San Nicolas, unda cu Departamento di Asunto Social (DAS) conhuntamente cu Centro pa Hoben y Famia y tambe e ekipo completo di e scol, a organisa un carousel di informacion pa mayor.

Fuente: Isla Online

E meta di e proyecto piloto aki ta pa trece diferente instancia y fundacion mas cerca di nos comunidad y pa asina e mayornan por sali bon ekipa y cu e informacion corecto di e diferente servicionan, guia y sosten cu cada instancia ta ofrece.

Sra. Miriam Illidge, trahado social na DAS a duna e mandatario un recorido y pasa serca tur e instancianan cu tabata presente durante e anochi di informacion.

Minister Croes a bisa cu iniciativanan asina den combinacion cu DAS y e scol den coordinacion cu Ministerio di Asunto Social ta un excelente idea unda cu e mayornan ta haya mas curashi pa acerca cada stand y busca e informacion corecto y asina educa nan mes y nos comunidad.

Despues e mandatario a papia cu cada un di instancianan presente. Sra. Marushca van der Linde-Noordzij, Interne Begeleider di e scol, a duna e mandatario un recorido di e scol unda a pasa saluda e docentenan y a gradici nan pa e trabou bunita cu nan ta haci pa e alumnonan.

Minister Croes ta gradici Directie Sociale Zaken y tur instancia cu tabata presente y ta felicita tur e empleadonan cu fuera di nan ora di trabou a contribui boluntariamente pa brinda e ayudo y informacion.

E proyecto piloto aki ta un ehempel pa otro scolnan y sigur ta conta cu sosten di Ministerio di Enseñansa.