Science Fair di EPI pa promove tecnologia
Recientemente a tuma luga e Science Fair di Colegio EPI seccion Ciencia y Tecnologia cu ta duna studiantenan e oportunidad pa demostra nan conocemento tecnico.
 |
E studiantenan di dos aña a cuminsa cu un proyecto di cual mester a traha un producto cu nan a traha riba dje ful e aña. E proyecto di e Science Fair a fungi como un plataforma pa e studiantenan demostra nan abilidadnan y conocemento adkiri den un forma creativo y inovativo. E proyecto tambe ta forma parti di e puntonan pa e studiantenan.
 |
A tuma luga un demostracion pa studiantenan di MAVO y pa publico general. E meta di e Science Fair ta pa promove tecnologia. “Nos tin 3 opleiding, tin opleiding Bouwkunde, Electrotechniek y Werktuigbouwkunde. Den bouwkunde p.e. nan a bin cu un stoel multi uzo y nan a bin cu casnan tradicional pero cu por spaar energia. Den Electrotechniek tabata tin un robot, un luz den cubes, luz cu ta draai y un hydro generator cu ta produci energia cu awa. Den Werktuigbouwkunde nos a haya un “solar car” cu ta un auto cu ta core riba solo. Tambe a haya 2 auto di cual uno ta drift y un ta manera un junior dragster“, Opleidingsmanager di EPI C&T, Randolph Tromp a remarca.
 |
E muchanan di 3de y 4de MAVO tabata tin e oportunidad pa observa e proyectonan pa asina nan por tin mas informacion prome nan mester kies e vak di Wiskunde y Natuurkunde, pasobra esey ta e 2 vaknan cu mester pa bay Techniek. Lamentablemente hopi di e muchanan ta laga e 2 vaknan aki cay afo. “Nos ta trata di promove cu si bo kier bay Techniek, bo mester sigui cu e vaknan ey. Hopi ta bira entusiasma y asina nos ta logra pa nan bin cerca nos“, asina Randolph Tromp a remarca.
 |
“Studiantenan a demostra nan abilidadnan y creatividad poniendo tur loke nan a siña durante e aña “Come to Life”. Loke mi a mira durante e evento aki a impresiona mi y mi ta convenci cu e ta na un nivel hopi halto, cu asta productonan cu por wordo comercialisa“, Minister di Enseñansa y Famia, Michelle Hooyboer-Winklaar a expresa.
 |
E studiantenan ta mustra loke nan a siña pero na mes momento nan ta realisando loke nan a siña por wordo aplica den algo cu comercialmente ta factibel. E tabata un exito rotundo y Minister Hooyboer-Winklaar tabata contento di mira hopi studiante entusiasma p’e parti tecnica y na otro banda e presencia di studiantenan femenino, cu a demostra cu nan no ta kedando atras.
Info / Contact
Pa mas informacion por busca den e alfabet menu riba homepage: [E]ducacion Profesional Intermedio (EPI) of por tuma contacto cu Colegio EPI.
Scroll To Top
