Reunion entre Inspectornan di Enseñansa di Reino
Na aña 2012 a cuminsa cu e proyecto CAST, unda cu Inspectornan General di enseñansa di Reino Hulandes ta topa dos biaha pa aña pa intercambia informacion y ideanan y pa discuti topiconan y retonan di interes pa tur partner.
 |
Na e di 8 reunion, Inspector General di Enseñansa di Corsou, Rubia Martina-Bitorina a bisa cu e conferencia aki ta pa elabora riba e exito di nan colaboracion, cu ta nifica masha hopi pa cada partner. Durante di e conferencianan a discuti topiconan di importancia pa tur pais. El a splica cu ora un persona ta den e mesun funcion tur dia, e ta core peliger di keda pega den e mesun tipo di asuntonan, sinembargo ta importante pa e tin e input di homologonan, pa e tende otro idea, haya un bista fresco riba cierto topiconan. E intercambio ta yud’e evalua cosnan y crece den su funcion. El a agrega cu e programa ta special, unda cu parti mainta a dedica na dialogo den un ambiente mas oficial y semper atardi e partnernan ta come hunto y combersa den un ambiente social.
Pa e team di Corsou, e relacion a nifica hopi pa nan a keda den contacto y yuda otro den trabao y ta bon pa sali mira otro caminda con cosnan ta bay. Martina-Bitorina a subraya cu “bo manera, bo moda” so no ta e unico manera, referiendo na e beneficio di por pidi e asistencia cu experiencia y e opinion di otronan den e mesun funcion cu e tin.
Coordinador di e proyecto, Liesbeth Klaver a comenta cu e conferencianan a sirbi pa reuni riba varios topico scogi hunto pa duna otro feedback y intercambia di informacion y desaroya cierto asuntonan hunto, aunke cada uno na su mesun forma y den su propio concepto y basa riba su necesidadnan tabata beneficioso.
 |
Pa Hulanda, compaña pa su dos coleganan di islanan BES (Boneiro, St. Eustatius y Saba) tabata un proceso durante cual nan a siña hopi di traha den e contexto di Caribe. Klaver a laga sa cu nan a siña hopi tambe tocante di e relacion di enseñansa cu cuido pa hubentud (“jeugdzorg”). Na Hulanda ta descentralisando e sistema, ta trahando den gruponan hopi mas chikito y ta busca e cooperacion, compara cu loke ta tuma luga riba e islanan. Tambe nan a beneficia di e discusionnan tocante topiconan cu mester desaroya riba e islanan, entre otro.
 |
Aruba ta masha contento di por tabata anfitrion di e conferencia aki den cual coleganan di Hulanda, islanan BES, Corsou, Sint Maarten y Aruba a topa otro aki pa hunto sigui desaroya formulanan pa traha hunto y asina logra metanan comun mas grandi pa loke ta calidad di enseñansa.
Evaluacion a mustra cu tur Inspectie a crece door di intercambio activo
E intercambio activo tumando luga den e ultimo 4 añanan entre Inspectornan di Enseñansa den Reino Hulandes tin un efecto positivo riba nan trabao y ta beneficia e studiante cu ta migra di un pais pa e otro den su “aansluiting” na su siguiente scol. Inspector General di Enseñansa di Aruba, John Hessen, a enfatisa cu e prome reunion a tuma luga na aña 2012 y e Inspectornan ta reuni dos biaha pa aña.
 |
Di acuerdo cu sr. Hessen, e topiconan trata ta regarda e trabao di Inspectie en general y ta encera intercambio di idea y “best practices” (miho practicanan). E resultado ta cu e Inspectornan ta traha mas cerca di otro y e colaboracion ta estrecho, como cu awo den Reino ta sinti cu nan ta comunica den diferente caso pa medio di simplemente “un yamada” tanten cu e teritorionan mes fisicamente no ta tur asina cerca di otro. A pesar cu ta existi diferencia entre e paisnan, tin hopi topico, asunto y retonan cu ta similar.
Durante di e ultimo conferencia, a haci un evaluacion di e ultimo 8 reunionnan y sr. Hessen a comenta cu loke mas a resalta ta cu tur Inspector tabata di acuerdo cu nan a crece den nan trabou. A tuma como ehempel ora na Aruba a presenta un studiante for di Sint Maarten, actualmente simplemente nan ta haci un yamada for di Inspectie aki pa Inspectie di e otro isla y ta haya tur informacion di e sistema di enseñansa cu e hoben a sigui pa asina yud’e cu e miho “aansluiting” posibel.
E inspectornan conoce awo e diferente formanan di enseñansa di cada teritorio y si nan tin mester di cualkier informacion adicional nan ta ricibi e datonan hopi mas lihe. Sr. Hessen a conclui bisando cu e beneficionan ta cu aunke cada pais ta haci su mesun maneho y trabou, pa medio di comparti y intercambia cu otro, nan cada un ta yuda e otro crece.
Info / Contact
Pa mas informacion por busca den e alfabet menu riba homepage: [I] Inspectie van het Onderwijs
Scroll To Top
