Prueba Nacional di Matematica
Minister di Enseñansa ta anuncia cu e Toets Final Nacional (Nationale Eindtoets) lo drenta scolnan basico bek despues di 6 aña. E toets nacional ta pa tur alumno di klas 6 di enseñansa basico cu ta subsidia door di Gobierno.
 |
Matematica
Pa e aña escolar aki e Toets Nacional lo consisti di preguntanan pa cu e area di formacion di matematica. Tur alumno di klas 6 lo contesta 90 pregunta di matematica dividi den 4 parti durante 2 dia. E preguntanan ta cuadra totalmente cu e metanan nucleo di matematica (kerndoelen rekenen & wiskunde), cu a wordo introduci na comienso di aña escolar 2015-2016.
Kerndoelen ta metanan nucleo riba nivel nacional, metanan cla y consistente cu ta trece mas uniformidad entre e diferente scolnan primario. Introduccion di e kerndoelen rekenen & wiskunde a tuma luga den forma di un dia di estudio pa tur maestro di scol preparatorio y scol basico. Pa tur scol ta cla awo unda ta e stacion final minimo pa cu matematica. [Video di splicacion di kerndoelen]
Nulmeting
“E meta di e toets nacional no ta pa wak si scolnan ya caba a logra yega e metanan nucleo (kerndoelen), cu apenas a wordo introduci na october aña pasa, pero si ta pa duna e scolnan un bista di e nivel di nan enseñansa di matematica na momento cu kerndoelen nacional a wordo introduci. E ta simplemente un “nul meting” pa nos por establece na unda cada alumno y scol ta actualmente”, minister Hooyboer-Winklaar a splica durante e dos dianan di encuentro cu tur cabesante y maestronan di 6de klas.
E toets lo wordo traha riba dianan 9 y 10 di juni proximo na un manera totalmente anonimo y no tin niun consecuencia pa cu e conseho, eind rapport of aceptacion di alumno na e scol secundario. Tur scol y alumno ta ricibi un number cu lo wordo uza pa identifica e scol/alumno. No ta necesario tampoco pa alumnonan train pa e toets aki. Loke lo wordo midi ta kico e alumno a siña na scol basico pa cu matematica y no locual nan a train pe den un par di siman.
Plan di mehoracion
E resultadonan ta importante pa e scol por formula nan propio plan di mehoracion pa cu e area di matematica teniendo otro factornan tambe na cuenta mirando cu no ta e scol so ta determina e resultado final di e alumno. Otro factornan tambe ta hunga un rol por ehempel si e alumno ta anima pa studia, cualkier retraso den materia for di añanan anterior, of si tin problemanan personal cu por ta afecta e prestacion di e alumno.
Nivel nacional
Cu e Toets Nacional, Gobierno tambe ta haya un bista di e nivel nacional y diferencianan entre scolnan cu ta existi riba tereno di matematica despues di algun luna cu a introduci e metanan nucleo y asina por sigui e proceso aki riba un nivel nacional pa midi su efectividad. E ta duna un indicacion di unda Aruba ta cu su enseñansa di matematica y unda nos lo tin cu adapta of pone enfasis adicional.
“Mi ta kere cu nos semper mester stipula cu ki meta nos ta test alumno pasobra hopi biaha ta uza toets pa screen nos alumno, pa identifica esun nan miho, y e meta no ta pa yuda nan progresa. E Nationale Eindtoets ta netamente yuda nos identifica con nos por traha na bienestar di nos alumnonan y enfoca riba e “transfer of knowledge” en bes di pone nan den categorianan predetermina”, minister Hooyboer-Winklaar a splica.
E minister a sinta cu tur Directiva di Scol tocante e toets aki. Tambe tur cabesante y maestronan di klas 6 a keda invita pa acudi na un reunion caminda nan haya un splicacion amplio di e metanan pa cu e toets aki. Den e reunion aki, caminda casi tur scol tabata presente, a haya oportunidad pa haci pregunta y duna input riba cierto puntonan. E directivanan y e scolnan a mustra hopi interes y entusiasmo pa cu e siguiente paso aki cu lo contribui sigur cu e calidad di nos enseñansa.
Pa otro aña e Toets Final Nacional lo consisti tambe di preguntanan di “Taal”, ya cu otro aña ta introduci Kerndoelen Taal.
Info / Contact
Pa mas informacion por busca den e alfabet menu riba homepage: [E] Enseñansa Primario of [K] Kerndoelen of por tuma contacto cu [M] Ministerio di Enseñansa.
Scroll To Top
