Proyecto Piloto Natuur en Milieu Educatie
Recientemente Minister di Enseñansa, dr. Armando “Rudy” Lampe, a introduci e proyecto piloto Natuur- en Milieu Educatie (NME).
Minister Rudy Lampe a menciona cu e tawata di bishita anteriormente na Parke Arikok en conexion cu construccion di un hardin botanico den Hofi Shon Shoco.
E meta di e hardin botanico aki ta pa siña e hoben nan cu ta nos futuro generacion tocante varios mata curativo y alabes di e diferente mata nan di Aruba su flora y fauna. Muchanan mester realisa kico ta pasando den nos medio ambiente y cu planeta tera ta algo unico, importante y maraviyoso. Door di planta un simia, por cosecha mata nan cu a lo largo lo por come y biba di dje.
Despues di a bishita e Cumbre riba Cambio Climatico na New York, Minister Lampe a realisa cu tin hopi interes pa proyectonan di e tipo aki y e cos positivo ta cu tin fondonan disponibel.
Parke Nacional Arikok mes ta un bon ehempel con fondonan di Union Europeo a yuda construi dicho parke y esaki ta e rumbo cu Aruba tin cu tuma.
Parke Nacional Arikok ta fundamental pa e educacion di e muchanan pa nan siña di naturaleza, medio ambiente, sostenibilidad y di Aruba su flora y fauna, pesey ta importante pa stimula pa mas hobennan bishita e parke aki.
Departamento di Enseñansa Aruba (DEA) a haya e tarea via un decreto ministerial (MB) y e team di DEA a duna tur di nan mes pa por entrega un producto di calidad. A haya hopi informacion y alabes training di Hulanda y awo e experto nan local ta bay adapta esaki pa algo cu lo traha na Aruba.
DEA a acerca diferente instancia e.o. Directie Natuur en Milieu (DNM) y Santa Rosa (LVV) pa asina haya nan cooperacion pa cu dicho proyecto.
E proyecto lo cuminsa cu 4 scol piloto. Mester menciona cu tur hende ta hopi entusiasma pa cu e proyecto aki, incluyendo e maestronan.
Departamento di Enseñansa Aruba (DEA) kier agradeci tur hende cu a duna un man pa haci e proyecto aki un realidad.
