Proyecto piloto SPO aña 4 y 5
Durante Conferencia di Prensa di Gobierno di Aruba, Minister di Enseñansa Endy Croes, a elabora riba un Proyecto Piloto pa SPO aña cuater (4) y cinco (5).
Meta
E mandatario di enseñansa a indica cu a base di varios peticion pa alarga e estudio na Scol Practico pa Ofishi (SPO), a inicia cu un Proyecto Piloto SPO aña cuater (4) y cinco (5). E meta di e proyecto aki ta pa ofrece e alumnonan cu termina SPO un alternativa pa sigui studia, na momento cu nan no por continua cu un estudio na EPB.
Grupo meta
A inicia e proyecto aki pa motibo cu e alumnonan di SPO ta demasiado hoben (averahe di 15 aña) na momento cu nan termina SPO y no ta cla pa drenta mercado laboral. Ademas di esaki, no tin suficiente tempo pa nan por acumula experencia di pasantia (stage).
Minister Croes a splica cu “doorstroom” na EPB no ta optimal, mirando cu e traspaso di enseñansa practico (praktijkonderwijs) pa ABO-2 (MBO 2) ta demasiado halto awo cu EPB ta ofrece esaki.
E grupo meta di SPO ta consisti di alumnonan cu cierto limitacion leve, diagnosis di autismo, ADHD y/of otro tipo di problema di comportacion. E grupo meta di e proyecto aki ta entre otro, e alumnonan actual cu ta den aña 3 y no ta alcansa e criterianan pa continua cu un estudio na EPB, e alumnonan di Traject Individueel Praktijk Onderwijs (IPO) y e alumnonan no mas bieu cu 18 aña cu no a wordo acepta e aña escolar anterior na EPB.
Programa
Lo bay ofrece dos programa educativo den e proyecto piloto: ABO nivel y “Arbeidsmarkttoeleiding”. E studiantenan aki ta haya oportunidad pa haya un trabou regular y/of continua ABO nivel 2.
ABO nivel 1 of “Entree-opleiding” ta prepara e alumno pa e mercado laboral como “assistent bassisberoepsbeoefenaar” y tambe lo por sigui na por ehempel, ABO nivel 2. E trabounan di e asistente ta menos complica y ta rekeri un forma di pensa y actua riba un tempo mas trankil. Grupo meta ta e alumnonan di aña 3 cu no por continua den forma optimal na EPB. E programa ta consisti di un combinacion di pasantia 2 pa 3 bes pa siman y les klassikaal 2 pa 3 bes pa siman y tin un duracion di 2 aña escolar. Na final di e di 2 aña escolar, e alumnonan ta ricibi nan diploma. Esunnan cu no a alcansa e nivel pa e diploma ta ricibi certificado, di cual ainda nan por sigui studia na Openbare Avondleergangen Aruba (OAA) pa por logra finalisa un estudio y toch haal un diploma.
Estudio
E estudionan cu lo ofrece ta entre otro, “Assistent dienstverlening”, “Assistent bouwen, wonen en onderhoud”, “Assistent horeca, voeding en voedingsindustrie” y “Assistent plant, dier of groene omgeving”.
“Arbeidsmarkttoeleiding” ta consisti di actividadnan cu ta yuda prepara e alumno pa haya un trabou, sea independiente of bou guia. E grupo meta pa “Arbeidsmarkttoeleiding” ta alumnonan di aña 3 di “Traject Individueel Praktijk Onderwijs” (IPO) y cu na momento nan termina nan no por continua nan estudio na EPB. E programa ta consisti di un “leerwerktraject” di 3 dia di pasantia y 2 dia di estudio na scol. E trayecto aki tin un duracion di 1 aña escolar. Na final di e trayecto e alumno ta ricibi su “praktijkverklaring”. E trayecto aki tambe conoce 1 aña di “Nazorg” despues cu termina, unda e alumno ta sigui ricibi guia riba distancia pa preveni e sali for di e sistema.
Finalmente Minister Endy Croes a indica cu lo implementa e prome aña di ABO 1 e Trayecto di “Arbeidsmartkttoeleiding” entrante aña escolar 2024-2025. Entrante aña escolar 2025-2026 lo tin e di dos aña di ABO 1 y e “Nazorg” di e Trayecto di “Arbeidsmarkttoeleiding”.
Fuente
Info / Contact
Pa mas informacion por busca den e alfabet menu riba nos pagina principal:
Por tuma contacto cu:
Scroll To Top
