Programa piloto “beyond the bell” pa scolnan secundario
E proyecto piloto pa un “naschoolse opvang” pa hobennan cu ta atendiendo scol secundario tin como meta pa stimula e hoben den su desaroyo completo y asina yuda mehora su prestacion na scol.
Minister di Enseñansa Michelle Hooyboer-Winklaar, hunto cu Minister di Asuntonan General, Prome Minister Mike Eman a anuncia cu e grupo di trabou trahando riba e proyecto pa un programa di merdia pa alumnonan di scol secundario a keda cla cu nan rapport y ta cuminsa guia e ehecucion di e proyecto piloto.
 |
Ta planea pa cuminsa na september 2014 y lo ofrece cupo pa 500 hoben di Ciclo Basico di EPB y MAVO, esta hobennan di mas o menos 12 y 13 aña. E programa piloto lo ta gratis. Lo scoge 4 of 5 scol den barionan rond Aruba y e intencion ta pa e hobennan participa na e programa na nan mesun scol.
E programa completo, na momento cu e wordo implementa den tur scol secundario (EPB, MAVO, HAVO y VWO), lo brinda cupo na alumnonan di scolnan secundario di 12 pa 18 aña di edad. E orario cu lo lansa e programa cu ne ta di 2or pa 5’or di atardi, cu e posibilidad cu lo por extende e programa te cu 6or di atardi. E programa ta tuma luga di dialuna pa diabierna, durante periodonan cu tin scol.
Na Aruba e programa Traimerdia, cu ta dirigi na muchanan di scolnan preparatorio y basico (kleuter-en basisscholen), ta bon conoci y ta funciona bon. Considerando e bon experiencia cu e programa aki y e desaroyonan den nos comunidad, unda por ehempel tur dos mayor ta traha y hobennan ta nan so na cas atardi, a bin cu e proyecto aki como un sosten pa e mayornan y un sosten pa e hobennan den nan desaroyo.
 |
Minister Hooyboer-Winklaar ta contento cu e desaroyo aki, cual a cuminsa cu e institucion di un grupo di trabou pa medio di un decreto gubernamental riba dia 7 di februari 2014. El a gradici e comision, cu a traha hopi lihe riba e proyecto y ta cla pa cuminsa cu su implementacion. E tipo di programa aki, conoci na Merca como “Beyond the bell”, na Aruba ta dirigi na ofrece oportunidadnan pa traha huiswerk, recreo, participacion na programanan di conscientisacion, social y comunitario, como tambe pa explora y desaroya talentonan. Gabinete Mike Eman a pone esaki como un di e puntonan central den e programa di gobernacion 2013-2017.
Un di e factornan principal di e programa ta pa brinda guia pa traha huiswerk, pero tambe lo tin diferente presentacion, participacion na proyectonan, actividadnan deportivo y di movecion, oportunidadnan pa descubri y desaroya talentonan musical, di arte y den deporte, entre otro.
Minister Hooyboer-Winklaar a subraya cu ta comproba rond mundo unda cu tin e tipo di programanan aki, cu e ta brinda resultado positivo riba e prestacionnan academico di e hobennan. Esaki ta pas tambe den e meta importante di Minister di Enseñansa pa duna asistencia y crea situacionnan cu ta yuda hisa e prestacion di nos hobennan na scol; esaki ta un di e miho formanan pa contribui na esaki, e mandatario ta bisa.
Tin ainda hopi trabou pa tuma luga, segun Minister Hooyboer-Winklaar, esaki ta inclui entrenamento adicional pa esunnan cu ta bay traha cu e hobennan. A dicidi pa haci uzo di e scolnan mes, como cu e edificionan, tereno y ambiente ta dirigi na “vang op” nos hobennan caba, como cu e mucha ta bay “naschoolse opvang” na su mesun scol no tin necesidad pa e mayornan regla extra transportacion y e edificio mes ta brinda e siguridad desea tambe.
Pa loke ta e personal, gobierno tin e meta di tene e proyecto aki uno cu ta “budgetneutraal”, o sea cu no lo costa extra placa. E personal lo wordo atrae for di entre personanan cu ya ta trahando cu gobierno caba. Nan lo ta encarga cu guia e hobennan y pues mester ta personanan cu ta competente y confiabel y lo bin un seleccion pa haya e personanan aki cu lo sigui training pa por traha cu e hobennan. Cada lider ta guia 15 hoben y lo ta entrena pa comunica cu e grupo, señala retonan cu comportacion, entre otro.
Minister Hooyboer-Winklaar cu entusiasmo ta trek e proyecto y brinda cooperacion pa yega na e realisacion di e proyecto piloto pa cuminsa na september proximo. Nos hobennan cu ta bayendo scol y nan mayornan mester y merece mas apoyo y cu e proyecto aki lo ofrece un programa balansa y hopi varia unda cu no solamente lo brinda ayudo cu tareanan di scol, pero lo tin hopi balor añadi pa e desaroyo general (algemene ontwikkeling) di nos hobennan.
Info | Contact
Pa mas informacion por busca den e alfabet menu riba homepage: [N] Naschoolse Opvang of por tuma contacto cu: Bureau Traimerdia
Scroll To Top
