Programa “Ban Pa Bay” pa studiante cu Arubalening
Realign Coaching Consultancy & Services hunto cu Departamento di Enseñansa Aruba (DEA) ta lansa e programa “Ban pa Bay 2025” pa tur studiante cu a haci peticion pa un Arubalening.
Esaki ta posibel cu sosten di Stimuleringsfonds y Strategic Educational Alliance (SEA) – Nederlandse Samenwerkende Hogescholen.
E programa aki ta consisti di seis (6) tayer unico, specificamente diseña pa yuda tur studiante cu a haci peticion pa un Arubalening y cu ta bay cuminsa cu un estudio superior, sin importa si nan ta bay studia na Aruba, Corsou, Hulanda, Merca, Canada of cualkier otro pais den exterior.
Kico ta “Ban pa Bay 2025”?
Un serie di 6 sesion interactivo, practico, educativo y motivacional, entre nan:
- 2 tayer online (un ya a tuma luga riba 16 april)
- 3 tayer fisico ku guia practico
- 1 tayer cu studiante hunto cu nan mayornan
Topico
E tayernan ta cubri topiconan manera:
- Con pa studia den educacion superior, prepara bo portfolio y planificacion;
- Assertividad, imagen propio y liderazgo;
- Transicion pa bida universitaria na Aruba y tambe den exterior;
- Maneho di emocion, independencia;
- Traha e presupuesto cu ta fit abo;
- Preparacion mental y cultural pa un miho integracion.
Pa ken e programa ta?
E programa ta special pa e studiante cu a aplica pa un Arubalening y cu ta bay cuminsa cu un estudio superior na Aruba of den exterior entrante augustus 2025.
Fechanan Importante
E tayernan lo tuma lugar entre april y juni 2025. Studiantenan cu a aplica pa un Arubalening a ricibi e link di registracion via email. Den e formulario nan por indica e fecha y ora di preferencia.
Fecha pa registracion ta te dia 22 di april 2025.
Cada grupo lo tin un maximo di 25 participante, pa garantisa calidad y atencion personalisa.
Esaki ta un oportunidad unico pa ta bon prepara y di e forma aki optimalisa bo exito for di comienso di bo estudio. “Ban pa Bay” ta un oportunidad unico pa yuda nos studiantenan prepara pa un futuro yena di reto, autonomia y exito! Bo futuro ta cuminsa awe. Ban pa bay!
Info / Contact
Pa mas informacion relaciona cu Arubalening por busca den e alfabet menu riba nos pagina principal:
Por tuma contacto cu:
Sigui nos via e social media pages:
- DEA facebook: @educationaruba
- DEA instagram: @educationaruba
