Profesor Hargreaves presente pa evento di aniversario di IPA
Instituto Pedagogico Arubano (IPA) ta celebrando su di 25 aña di aniversario cu un serie di encuentro sumamente interesante y importante pa enseñansa na Aruba, y cu un balor agrega sumamente grandi tanto pa e lidernan den enseñansa como docentenan di scolnan di tur nivel.
 |
Minister di Enseñansa Michelle Hooyboer-Winklaar a expresa di ta hopi orguyoso cu pa e conmemoracion grandi aki a logra haya Profesor Andy Hargreaves pa lidera e tres dianan di intercambio, unda cu tur esunnan presente a haya e oportunidad pa comparti diferente pensamento y bay mas profundo den cierto topiconan riba tereno di enseñansa.
Profesor Hargreaves ta un orador mundialmente conoci y reconoci pa su trabou; el a skirbi mas di 30 buki y na aña 2015 a ricibi e titulo como e di seis persona cu mas influencia riba tereno di Enseñansa. Profesor Hargreaves ta ocupa e posicion di liderazgo y e titulo di “Thomas More Brennan Chair in Education” na Lynch School of Education di Boston College. Su mision ta pa promove husticia social y conecta teoria cu practica den educacion.
Minister Hooyboer-Winklaar a remarca cu na Aruba e ta compartiendo informacion y pensamentonan cu a sali di diferente estudio. Algun di e preguntanan cu ta wordo considera ta: Kico ta contribui na haci di e maestro un persona cu por duna les na un forma mas efectivo y inspirativo; y kico ta e ingredientenan cu ta contribui na crea un miho maestro.
Di otro banda, segun e mandatario ta splica, e professor tambe a papia tocante di e sistemanan y factornan cu ta desbentahoso pa un persona yega na ta un miho maestro.
E titular di enseñansa ta subraya cu tur sistema di enseñansa ta rekeri mehoracion, pasobra ningun sistema ta perfecto, y for di e intercambio cu Hargreaves lo discuti un sinfin di topico cu ta contribui na eventual cambionan cu por ta beneficioso.
E minister ta enfoca riba uni tur perspectiva den un evento. El a bisa enfaticamente cu ta bon conoci cu pensa di cambio ta hopi facil, kico mester cambia y implementa ta mas dificil, y yega na e punto cu ta sostene e cambionan ta e fase mas dificil. Locual cu e ta desea di yega na dje, el a conclui bisando, ta un bista di kico por haci na Aruba pa adapta e sistema, con pa adopta e miho practicanan y haya tambe e “draagvlak” mas grandi posibel pa logra implementa y sostene e “best practices”.
Website: [Andy Hargreaves]
Info | Contact
Pa mas informacion por busca den e alfabet menu riba homepage: [I] Instituto Pedagogico Arubano (IPA) of por tuma contacto cu: IPA.
Scroll To Top
