Posibilidad pa renoba scolnan pa medio di Public Private Partnership
Mundialmente, y den e ultimo añanan na Aruba tambe, tin diferente proyectonan exitoso cu ta wordo realisa pa medio di sociedadnan entre e sector publico (gobierno) y e sector priva. Ministerio di Enseñansa actualmente ta haciendo un sondeo pa cu oportunidad y posibilidadnan pa aplica modelo PPP (public private partnership) pa realisa renobacion y expansion di scolnan cu tin necesidad.
 |
“Mi ta mira esaki como un posibilidad real pa por financia un suma di entre 250 pa 300 miyon florin cu ta necesario pa renoba y modernisa nos scolnan por completo,” asina Minister di Enseñansa, Michelle Hooyboer-Winklaar a duna di conoce.
Tin un total di 84 edificio cu ta wordo uza pa scol, mayoria ta entre 40 pa 60 aña bieu y nunca a ricibi un renobacion amplio. Mas of menos 70% di e 84 edificionan mester di un renobacion grandi. Ademas di e necesidad pa renobacion, desaroyonan den enseñansa, particularmente den e ultimo decadanan, ta rekeri cierto adaptacion pa e scolnan por introduci elementonan y materialnan inovativo y moderno.
Pa por brinda enseñansa efectivo y eficiente mester adapta e infrastructura di e edificionan actual. E adaptacionnan aki ta inclui ampliacion di e diferente espacionan pa duna lesnan specifico. Entre e espacionnan y lokaalnan nobo cu mester agrega na e scolnan tin lokaal pa Natuur en Techniek; un espacio pa CKV; un lokaal cu computer; un mediateca; un espacio multifuncional; lokaalnan of oficinanan pa e “interne begeleider” (IB-er), e “remedial teacher”, SMW, dokter y lokaal pa Prisma.
Pa medio di Fondo Desaroyo Aruba (FDA) a logra inverti 22 miyon florin den e ultimo tres añanan den e renobacion di diferente scol; actualmente tin mas of menos cinco miyon florin ainda pa inverti den transcurso di e ultimo lunanan di 2016. E fondonan aki tabata aloca den FDA pa proyectonan di infrastructura di scol.
Pa por sigui cu e renobacionnan necesario, y pa inclui modernisacion den nos scolnan manera digitalisacion cu tablets y digiBoards, y mueblenan nobo, ta necesario pa sondea e posibilidad pa financia esaki via un modelo di Public Private Partnership (PPP). Minister di Enseñansa lo traha cu expertonan pa asina aculuma tur informacion y evalua si un model di financiamento via PPP por ta factibel pa enseñansa na Aruba.
Un condicion clave lo ta cu e PPP lo solamente cubri gastonan relaciona cu e inversion, pero no lo cambia ken ta “doño” di e edificio, esta Land Aruba, of cualkier otro stichting. E propiedad pues no ta cambia di doño.
E intencion ta pa aplica e modelo PPP pa renobacion di e scolnan cu ta pendiente pa renobacion of construccion. E lista ta inclui entre otro Reina Beatrixschool, Scol Preparatorio Frere Bonifacius, Rosa College, Ceque College, Scol Practico pa Ofishi P’ariba, y Prins Bernardschool, banda di tur otro scolnan cu lo rekeri un renovacion di un forma of otro.
E plannan ta inclui tambe sistema di alarma y instalacion di camara pa tur scol, cual ta wordo gemonitor for di un centro nobo cu lo bira e IT Centrum pa tur na Aruba.
“Nos ta premira cu lo tuma algun luna pa cumpli cu e sondeo, pa presenta esaki na Parlamento di Aruba.” Minister Hooyboer-Winklaar a splica.
Info / Contact
Pa mas informacion por busca den e alfabet menu riba homepage: [F] Faciliteiten of [O] Onderhoud Scholen.
Scroll To Top
