“Op kamers” na Hulanda
Den Haag – Tur aña un cantidad grandi di studiante di Aruba ta bay Hulanda pa sigui cu un estudio avansa. Como sosten na e studiantenan aki, Gabinete di Aruba (Arubahuis) ta encarga e studiementoren pa duna informacion di camber den nan region.
 |
Mester tene na cuenta cu na diferente ciudad na Hulanda caminda tin un cantidad grandi di studiante, ta dificil pa haya un camber den bon condicion y na un bon prijs.
Pa e motibo aki ta importante pa e studiante informa su mes debidamente y na tempo di e pasonan cu e studiante mester tuma pa yega na un camber.
|
Leiden, Delft y Den Haag
Pa cu e region di Leiden, Delft y Den Haag, studiementor Charité Hu-a-ng-Brion ta informa cu e demanda pa camber ta grandi, mientras cu e cantidad di cambernan disponibel ta hopi chikito. Esaki ta varia tambe pa ciudad. Su conseho ta pa e studiantenan inscribi na un asina yama “kamerbemiddelingsbureau“ asina cu nan tin bista riba unda nan ta bay studia. Ta existi e posibilidad cu algun kamerbemiddelingsbureaus, despues cu e studiante inscribi cerca nan, cu nan mes lo tuma contacto e studiante.
Akinan ta publica un lista di website caminda por busca y inscribi pa haya un camber na e ciudadnan Leiden, Delft y Den Haag.
- www.duwo.nl (schrijf je nu al in)
- www.vestingvastgoed.nl – info@vestingvastgoed.nl
- www.staedion.nl
- www.esteon.nl
- www.kamernet.nl
- www.kamertjehuren.nl
- www.strijkijzer.nl
- www.woonnet-haaglanden.nl
- www.opkamers.nl
- www.studentenkamers-leiden.nl
- www.kamers.nl
- www.rooming.nl
- www.sls.nl
- www.kamerhulp.nl
Pa loke ta e procedura pa aplica pa camber pa studiante, ta bon pa e studiante lesa e condicionnan cu e inscripcion ta hiba cu ne, manera e fee cu bo mester paga, con largo bo mester warda pa haya un camber y e condicionnan cu tin na momento cu e studiante acepta un camber.
Pa hopi website bo mester traha un account pa asina yega na e informacion. En general hopi camber pa studiante ta forma parti di complehonan estudiantil, unda cu tin biaha bo mester comparti cushina y baño cu e otro studiantenan. E forma di biba aki por mustra un tiki fastioso, pero tin biaha ta miho pa tuma un camber asina y una bez e studiante yega Hulanda e studiante mes por busca mas dirigi na un camber cu ta pas mas pa cu ne. E idea pa huur un studio of apartamento ta zona hopi bon, pero den mayoria caso e prijs di huur ta hopi halto. Den diferente ocasion esaki ta bay tambe via di un makelaar cu ta exigi un borg hopi halto.
 |
Utrecht
Studiementor Reina Danje ta informa cu por ta hopi dificil pa haya un camber na Utrecht debi cu tin hopi studiante y tiki camber. Pa cu esaki tin un wachtlijst y Utrecht conoce e sistema di “hospiteren“ cu ta encera cu un studiante cu ta bin na remarca pa un camber ta wordo invita pa un asina yama “hospiteeravond“, na unda e studiantenan cu ta bibando den e compleho of e cas ta dicidi ken ta haya e camber.
Mirando cu na Utrecht mes ta dificil pa haya un camber ta recomendabel pa busca tambe den vecindario di Utrecht manera por ehempel na Nieuwegein, IJsselstein, De Bilt, Bilthoven, Zeist, Amersfoort, Vianen y Houten.
Hopi studiante di Aruba ta prefera un camber cu su mesun baño y cushina. Esaki ta posibel y bo ta papia aki di un “studio“ di cual e prijs di huur pa luna ta 700 euro of mas. Alabes hopi biaha un persona (p.e. bo mayornan) lo mester para garantia pa e pago di huur.
Den e caso di un camber den un compleho di studiante bo lo mester comparti baño y cushina, pero di otro banda e huur ta mas barata, bo ta cera conoci cu mas hende y casi semper tin un persona na cas.
Pa loke ta Utrecht tin algun canal pa busca camber. Esun mas conoci ta Stichting Studentenhuisvesting (SSH). E fee pa inscribi ta 12,50 euro y un persona por inscribi for di su 16 aña di edad. Mas tempran bo inscribi, mas grandi bo chens ta bira pa haya un camber. Banda di un inscripcion na SSH ta recomendabel pa inscribi tambe na Woningnet. Si combina e inscripcion cu esun na SSH bo ta paga unicamente 22,50 euro, enbez di 30 euro pa Woningnet so. Ta bon pa check e website di e instancianan aki bon pa e condicionnan di inscripcion. Via Facebook tambe por busca camber. Un otro opcion ta haci uzo di “makelaar“.
Ta recomendabel pa inscribi na diferente instancia cu ta ofrece camber. E ta un inversion, pero e por yuda e studiante haya un camber mas lihe.
 |
Info | Contact
Pa mas informacion por busca den e alfabet menu riba homepage: [S] Studia na Hulanda of por tuma contacto cu: Arubahuis
Scroll To Top
