OAA Beroepsonderwijs
OAA Beroepsonderwijs ta creciendo basa riba demanda di mercado. E combinacion di teoria y practica ta duna bon resultado segun Minister di Enseñansa Michelle Hooyboer-Winklaar.
Recientemente e minister tabata di bishita na EPB Hato pa cera conoci cu alumnonan cu a cuminsa cu e cursonan di Assistent Automonteur, Assistent Onderhoudsmonteur y Assistent Mode en Kleding.
E cursonan aki ta wordo ofreci den oranan di anochi pa medio di OAA (Enseñansa pa Adulto), beroepsonderwijs (enseñansa pa ofishi/profesion).
E cursistanan a cuminsa na januari 2017 cu e cursonan cu tin un duracion di un total di dos aña.
E curso ta parti den diferente periodo pa cual e cursista ta ricibi un “deelcertificaat“ na momento cu e completa e periodo cu exito. Pa e cursista ricibi un diploma e mester cumpli cu e deelcertificaatnan rekeri.
Los di e motibo pakico un cursista ta scoge pa un curso na OAA, Minister di Enseñansa ta di opinion cu loke ta importante ta cu pa medio di OAA ta ofrece mas persona adulto e oportunidad pa sigui studia den nan ramo of un ramo nobo, y asina profesionalisa nan mes.Minister Michelle Hooyboer-Winklaar ta contento pa experencia e entusiasmo di e alumnonan, kende pa un motibo of otro no a sigui of completa un estudio, of no ta siguiendo cu un estudio den dia. E gruponan ta consisti di entre otro adultonan cu ya ta trahando caba den e ramo cu nan a scoge pa studia, nan ta graduadonan di EPB cu ta desea di sigui cu un curso cu ta resulta den un diploma pa un ofishi, of personanan cu ta tumando e curso como base pa cambia di ofishi/trabou.
Esaki basa riba e principio di Lifelong Learning cu Minister Hooyboer-Winklaar ta sostene y promove. OAA ta duna e cursista e espacio pa combina un estudio cu nan trabou diario, asina ofreciendo nan un combinacion pa adelanto y desaroyo personal.
E mandatario ta agrega cu lo sigui expande y adapta e tipo di cursonan ofreci, basa riba e demanda di e mercado laboral. Mirando e grupo grandi di cursista cu un aspiracion pa sigui studia, por conclui cu sigur tin un demanda di parti di e alumnonan pa e cursonan di OAA. El a remarca cu e sistema di deelcertificaat tambe ta beneficia e alumno como cu e ta haci e programa hopi flexibel.
Reggie Havertong, director adhunto di OAA, a splica cu mayoria di e hobennan participando a caba SPO y kier a sigui studia. El a elabora riba e programa: cursistanan ta bin scol cinco dia pa siman – tres dia ta dedica na e parti practico, un dia ta encera lesnan di teoria (ciencia y wiskunde) y e di cinco dia ta lesnan di e idiomanan Papiamento y Hulandes.
OAA ta sumamente contento cu e bishita di e titular di enseñansa, como un demostracion di su sosten y apoyo na e programa y e alumnonan. Havertong a conclui bisando cu lo sigui mercadea OAA y e cursonan cu nan ta organisa pa brinda mas oportunidad na e comunidad, pa mas hende por caba scol y sinja un bon ofishi.
Info / Contact
Pa mas informacion por busca den e alfabet menu riba homepage:
Scroll To Top
