Nuebe studiante di Aruba ta ricibi Beca di Reino
Recientemente a tuma luga presentacion di nuebe (9) studiante cu lo haci uzo di e prome Beca di Reino (Koninkrijksbeurs).
Entrante 1 di september proximo e studiantenan lo cuminsa cu nan intercambio di estudio of pasantia na un di e paisnan den Reino Hulandes.
Na luna di januari 2023, Minister di Enseñansa saliente di Hulanda Sr. Robbert Dijkgraff tabata na Aruba, unda cu a anuncia e proyecto di Beca di Reino. Hulanda a aproba 500 mil Euro pa aña pa e Koninkrijk Mobiliteit Beurs. E intercambio aki ta brinda e studiantenan di Colegio EPI y Universidad di Aruba e oportunidad pa haci nan pasantia of intercambio di estudio di seis (6) luna na Hulanda. E ora e studiante ta mas sigur si nan a gusta Hulanda pa continua cu nan estudio.
E Beca di Reino ta un programa di mobilidad pa tur studiante den Reino Hulandes y ta diseña pa haci posibel e intercambio di studiante pa un tempo cortico, asina e di porcentahe di exito mucho mas halto. Esaki cu e meta pa evita dropout y desapunto na momento cu e studiante scoge pa haci un estudio completo den exterior.
Despues di tur e trabounan realisa a otorga na 9 studiante, di cual 8 di EPI y 1 di Universidad di Aruba e Beca di Reino pa bay Hulanda cu tur gasto paga. Otro aña lo tin 120 cupo disponibel entre Curaçao, Sint Maarten y Aruba pa e proyecto aki.
Mi ta motiva e studiantenan di IPA, EPI y Universidad di Aruba pa aplica na tempo e Beca di Reino pa bin na remarke den e proximo grupo. Mi ta gradici colega Minister nan di Reino Hulandes, specialmente Minister di Enseñansa saliente di Hulanda Sr. Robbert Dijkgraaf pa haci e proyecto aki posibel. Tambe mi ta gradici e stuurgroep, Departamento di Enseñansa Aruba, IPA, EPI y Universidad di Aruba pa nan excelente colaboracion y trabou di ekipo. Masha pabien na e studiantenan y hopi exito na Hulanda.
