Minister ta reuni cu scolnan pa Enseñansa Special di DPS

December 3, 2021

Recientemente e Minister encarga cu Enseñansa (Croes) tabatin su prome encuentro cu e cabesantenan di Emma School, Scol Paso pa Futuro y Scol Basico Dornasol.

Fuente: Isla Online

E scolnan aki pa Enseñansa Special ta cay bou di Dienst Publieke Scholen (DPS) cu ta resorta directamente bou di Ministerio di Enseñansa.

Presente na e reunion aki hunto cu e mandatario tabata su dos conseheronan riba tereno di enseñansa.

Durante e reunion e cabesantenan a vocifera nan inkietudnan y necesidadnan y e puntonan aki a wordo compila pa e ministerio. Mester agrega cu algun di e puntonan menciona ya tin atencion di Ministerio di Enseñansa. Tin di e problemanan cu por wordo resolvi a corto plaso y tin cu ta tuma un poco mas tempo, pero a base di e informacion compila lo formula un plan pa bin cu un solucion concreto.

E cabesantenan a expresa di ta hopi contento cu e Minister a scucha nan problemanan y tambe con pa resolve esakinan. Minister Croes a haya un bista cla y tin bon informacion di cada scol. E mandatario su deseo y empeño ta pa soluciona problematicanan mas tanto posibel, crea espacio pa trankilidad, paz y mehoracion riba e tereno di enseñansa.