Minister Hooyboer-Winklaar contento cu anuncio di DUO
Despues di un periodo largo di intercambio y deliberacion entre e paisnan a yega asina leu cu Dienst Uitvoering Onderwijs (DUO) lo habri un cuenta di banco local na Aruba pa facilita e pago di debe di estudio, asina Minister di Enseñansa, Cultura y Ciencia di Hulanda, Jet Bussemaker a anuncia durante su bishita na Aruba.
 |
Dia 1 y 2 di december ultimo Minister di Enseñansa Michelle Hooyboer-Winklaar a ricibi bishita di Minister Bussemaker. E dos ministernan tin un relacion estrecho di trabou pa e ultimo 3 añanan colaborando na un manera hopi positivo riba diferente area di enseñansa y di emancipacion.
E programa di e bishita di Minister Bussemaker tabata uno hopi varia y a inclui in reunion bilateral entre e dos mandatarionan.
Un topico importante cu a keda discuti den e reunion bilateral aki ta e topico di financiamento di estudio di Hulanda conoci como DUO.
Despues di un periodo largo di intercambio y deliberacion entre e paisnan a yega asina leu cu Minister Bussemaker por a anuncia oficialmente cu Dienst Uitvoering Onderwijs (DUO) lo habri un cuenta di banco local na Aruba pa facilita e pago di debe di estudio di ex studiantenan. Cu e cuenta di banco local e pago di debe di estudio lo bira mas facil y menos costoso pa nos studiantenan di Aruba. Ex studiantenan di Aruba lo spaar pa loke ta gastonan di transaccion internacional y gastonan ora di fluctuacion di e koers di Euro.
Esaki tabata un deseo di Aruba y e resto di e islanan den reino pa hopi tempo caba y finalmente esaki a bira posibel. E proceso a tuma sigur 2 aña di dialogo continuo entre e Ministerionan di Aruba y Hulanda y a wordo haci posibel door di e esfuerso di miembro di parlamento Desiree de Sousa-Croes cu a percura cu e tema aki a keda riba agenda di e reunion Interparlamentario di Reino, esta IPKO.
Durante e reunionnan di IPKO e delegacion di Aruba semper a boga pa e posibilidad di un cuenta di banco local na e islanan, e dollarisacion di e suma di e debe pa asina evita fluctuacionnan di koers den desbentaha di e studiante, un posibel helpdesk di DUO na Aruba pa facilita cu informacion, como tambe un areglo di pago mas conviniente pa nos ex studiantenan di Aruba.
Finalmente por bisa cu a logra pa awo 2 punto importante di e 4 puntonan menciona.
E proceso aki mester a conta cu cooperacion y colaboracion di diferente instancia na Hulanda pa por haci’e posibel, incluyendo Ministerio di Finansas mirando cu mester a explora y analisa e ley y posibel implicacionnan huridico, financiero y logistico.
Minister Michelle Hooyboer-Winklaar ta sumamente contento cu a logra haci e pago di debe di estudio di DUO mas facil y menos costoso pa nos ex studiantenan na Aruba. E titular di enseñansa a menciona cu e tin un compromiso cu nos studiantenan y nos ex studiantenan di Aruba pa asina crea mas opcion y haci studia riba nivel di enseñansa superior mas accesibel y economico posibel.
Pa mas informacion di e cambionan pa cu pago di debe di estudio pa studiantenan di Aruba por bishita e website: https://www.duo.nl/particulier/footer/service/antillen.jsp.
 |
Info / Contact
Pa mas informacion por busca den e alfabet menu riba homepage: [S] Studia na Hulanda of [S] Studia > Cancela debe di estudio. Tambe por tuma contacto cu DUO [website] – [facebook page].
Scroll To Top
