Minister a reuni cu Desaroyo di Curiculo
Diahuebs dia 9 di december 2021, e Minister encarga cu Enseñansa (Croes) a reuni cu seccion Desaroyo di Curiculo di Departamento di Enseñansa Aruba (DEA).
Fuente: Isla Online
E seccion ta encarga cu desaroyo di curiculo cu e meta pa e.o. percura pa material educativo cu ta tene cuenta cu e mucha cu ta biba na Aruba.
Durante e reunion minister Croes a combersa cu director di DEA, sra. Anne-Marie Proveyer-Groot, sra. Gracy Garcia-Dijkhoff y sra. Carola Peeters di Seccion Desaroyo di Curiculo, kendenan a duna e mandatario mas informacion di con e seccion ta funciona.
Historia di Status Aparte
E reunion aki tambe a conta cu presencia di sr. Manolo Giel, kende ta trahando riba e historia oficial di Status Aparte. E deseo di Minister sr. Endy Croes ta pa e historia di Status Aparte keda documenta pa medio di un curiculo na cual Departamento di Enseñansa ta duna aporte pa asina e por keda implementa na e scolnan preparatorio, basico y secundario. Den scol preparatorio y basico e alumnonan ta siña conoce, riba nan nivel, e historia di Status Aparte y den scol secundario lo inclui e topico den material existente di historia.
Durante e reunion a palabra cu lo consulta sr. Giel, como experto riba e tereno di Status Aparte, durante e proceso pa inclui e tema di Status Aparte den e metodo ‘Whizz-Art’ como tambe den e proceso pa amplia e metodo existente ‘Bahul’ pa e scolnan di mavo. Ademas a menciona e posibilidad pa publica e trabou di sr. Giel como parti di e seri Edicion Educativo, cu tin como meta pa yuda e docentenan cu preparacion di les relaciona cu topiconan di Aruba.
Info / Contact
Pa mas informacion por busca den e alfabet menu riba e pagina principal:
Pa informacion di contacto:
Scroll To Top
