Mensahe di Minister di Enseñansa
“E regalo di mas balor cu nos por duna nos yiunan ta tempo“ ta e mensahe di Minister di Enseñansa Michelle Hooyboer-Winklaar na ocasion di apertura di aña escolar nobo.
 |
Awor cu scol a habri tin hopi atencion riba tur e detayenan pa nos yiu bay scol y ta miho prepara pa un aña escolar. Esaki sigur ta central den mayoria pensamento e simannan nos dilanti. Mi ta encurasha tur mayor pa tuma e tempo pa combersa cu nan yiunan. Splica nan e importancia di tin un bon educacion y con esaki ta beneficia nan den nan bida despues.
“E tas, e pañanan nobo, e celular y tur otro preparacion tin biaha ta mustra e cos di mas importante na cierto momento, pero tur esaki no tin e mesun balor cu e tempo cu un mama, tata of famia por duna na papia y conseha nan yiunan“, asina Minister Hooyboer-Winklaar a bisa na ocasion di apertura di e aña escolar nobo.
“E regalo di mas balor cu nos por duna nos yiunan ta nos tempo y atencion specificamente riba e tema di enseñansa“.
Awendia tempo ta scars. Mayornan ta traha y tin biaha ta traha hopi ora pa percura pa entrada necesario pa famia. Esey ta e realidad di awe. Hopi mayor ta sinti esaki tur dia, ora cu debi na trabou e tempo cu nan yiu ta keda limita. Esaki sinembargo ta un hecho normal den mayoria famia moderno y bo yiunan no necesariamente lo corda esey.
E bon noticia ta, cu hasta cu tiki tempo, e por haci un diferencia grandi na e bienestar emocional di nos yiunan. Lesa, combersa tocante nan dia, haci preguntanan di con nan ta sinti diariamente, ta tuma no mas cu 10 minuut di tempo pa haci.
“Loke si nos yiunan lo corda mas ta e momentonan cu nos a dedica na nan, dunando nan e guia y atencion necesario. Y ta esaki ta e regalo di mas grandi cu nos por duna nos yiunan pa e aña escolar aki“, Minister Hooyboer-Winklaar a termina bisando.
Ban hunto supera e resultadonan di aña pasa
 |
“Mi a topa cu hopi cara awa, tin tabata tristo pero mayoria contento. Cu e animo ey nos ta cuminsa hunto e aña escolar nobo, cu un compromiso colectivo pa na final logra miho resultadonan den nos enseñansa“, asina Minister Michelle Hooyboer-Winklaar a bisa cu un bos alegre y un cara contento riba e prome dia di scol.
Gobierno a probecha den e temporada di vakantie pa drecha scol, basha asfalt, drecha e situacionnan mas urgente y garantisa cu e scolnan ta den miho condicion posibel pa ricibi studiantenan den e aña escolar nobo, 2016-2017.
Tambe a probecha pa sigui cu e proyecto di “Summer School” pa yuda alumnonan cu ta drentando HAVO pa ta miho prepara pa e trayecto nobo y mas dificil den nan educacion. Esaki ta dunando masha bon resultado y ta nota tur aña cu tin mas interes.
Prome dia di scol semper ta habri cu sentimentonan mixto, tanto di e muchanan nervioso, cu ta yora, cu no kier bay laga nan mayornan, cu ta haya falta di vakantie, cu ta timido pa e docente nobo y studiantenan nobo, mientras cu di otro banda tin studiantenan contento, entusiasma y cu hopi dinamismo pa studia miho posibel pa logra miho punto pa por alcansa nan metanan.
E sector di enseñansa na Aruba ta grandi y ta conta cu mas o menos 21.000 studiante, cuminsando for di e nivel di mas jong te na e nivel di mas halto, sin distingui edad. Aruba ta conta cu mas di 1800 docente, parti den 83 diferente scol.
Aña escolar 2015-2016 a termina bon, den sentido cu e resultadonan general tabata miho cu e añanan escolar anterior. Tambe Gobierno ta orguyoso di anuncia cu mas studiante a scoge pa sigui studia den enseñansa superior den exterior, tanto den region, Merca, Canada y cu e mayoria bayendo Hulanda. E tendencia aki ta positivo pasobra locual nos planta awe, ta cosecha mayan, ora cu mas hoben regresa Aruba cu un educacion superior, universitario of mas halto.
“Studiantenan, mayornan, docentenan, tur hende envolvi den enseñansa, laga nos traha hunto pa logra lo miho pa nos studiantenan. Mas ciudadano bon studia nos produci, mas grandi e oportunidadnan ta pa Aruba sigui progresa y logra tur nos metanan riba tur tereno“, Minister Hooyboer-Winklaar a termina bisando den un tono di orguyo.
Info / Contact
Pa mas informacion por busca den e alfabet menu riba homepage: [M] Ministerio di Enseñansa
Scroll To Top
