Mas upgrading pa Colegio San Nicolas
Ministerio di Enseñansa ta informa cu Colegio San Nicolas ta sigui conoce mas “upgrading”, mas ampliacion y renobacion.
 |
For di momento cu Gobierno a tuma e institucion over for di SMOA y pone bao di Dienst Publieke Scholen, e instancia pa scolnan publico, Colegio San Nicolas a conoce hopi cambio. No solamente e cantidad di alumno y docentenan a crece enormemente, pero tambe a percura pa e scol su infrastructura conoce ampliacion considerabel.
Minister di Enseñansa, Michelle Hooyboer-Winklaar ta contento cu a logra pa diferente trabao necesario tuma luga den Vakantie Grandi cu inversionnan for di Fondo Desaroyo Aruba (FDA). Un suma di mas of menos 1.6 miyon florin ta destina pa Colegio San Nicolas pa cubri e trabaonan aki.
Colegio San Nicolas su crecemento a haci necesario pa anexa Arubanita Kleuterschool y e tempo a yega pa e renobacion di e parti aki tuma luga. E area aki ta encera tres klaslokaal, e oficina di con-rector, e oficina di e sociaalmaatschappelijkwerker y lo agrega blok nobo di baño pa e docentenan. Cu mas expansion na caminda, a dicidi pa añadi e edificio bieu di Maria Reginaschool na Colegio San Nicolas. E parti pariba di e structura aki ya ta den proceso di renobacion y aki lo bay aloca e N&T lokaal nobo.
 |
Un otro elemento necesario ta e cura di scol y cu e inversion aki lo porfin crea un situacion manera debe ser. Den e prome fase lo enfoca riba e edificio existente y lo inclui Arubanita. E cura lo inclui e parti patras di Colegio San Nicolas y lo caba na e gymzaal existente. Ta esencial pa mantencion di siguridad pa e studiantenan y docentenan pa tin bon control di ken ta drenta y sali for di e tereno di e scol, y pa e motibo aki lo traha tambe riba e entrada principal di e scol.
E compania cu a gana e destaho pa haci e construccion na Colegio San Nicolas ta Geerman Construction y nan a cuminsa traha caba den diferente area. Ta premira cu e prome fase di e renobacion ta keda cla pa cuminsamento di aña 2017 caba.
Di e edificionan cu ta wordo anexa lo uza solamente e murayanan existente. Ta reemplasa e dak, plafon, bentana y portanan cu materialnan nobo y ta bin un instalacion di coriente y airconan nobo. E motibo principal pa cera e edificionan aki na prome luga tabata e daknan di asbest cu no tabata sigur mas.
 |
Minister Michelle Hooyboer-Winklaar ta satisfecho cu e progreso di e trabao tumando luga na Colegio San Nicolas riba e infrastructura di scol, pero mas ainda e mandatario ta contento pa experencia e crecemento di e scol, e esfuersonan y trabao duro di e docentenan, alumnonan y nan mayornan y e desaroyonan positivo pa cu HAVO y VWO na San Nicolas.
Info / Contact
Pa mas informacion por busca den e alfabet menu riba homepage: [F] Faciliteiten of [O] Onderhoud Scholen.
Scroll To Top
