Proyecto Promocion di Lesamento
Proyecto Idioma den Enseñansa
Durante aña escolar 2013-2014, Departamento di Enseñansa Aruba (DEA) a lansa “Proyecto Promocion di Lesamento” den cuadro di e projectdossier “Voorzieningen Taalbeleid”, cu tabata un programa di Fondo Desaroyo Aruba (FDA). FDA a financia e proyecto y Proyecto Idioma den Enseñansa a ehecuta e proyecto.
Proyecto Idioma den Enseñansa di DEA, cu a lanta na mei 2005, a traha riba e condicionnan necesario pa introduccion di Papiamento den enseñansa pa loke ta trata:
- Material di referencia linguistico
- Buki literario na Papiamento
- Un campaña pa promocion di Papiamento
Maneho di lesamento
Na 2006 a sali e nota ‘Lesa pa bida largo’. E nota aki tabata un proposicion pa maneho di provision di buki y promocion di lesamento. Proyecto Idioma den Enseñansa a publica hopi buki na Papiamento pa mucha. Pero publica buki pa lesa no ta suficiente. Mester motiva lesamento tambe, na prome luga cerca e muchanan. Lo ta bon si henter comunidad ta motiva pa lesa, pa e muchanan por haya un bon ehempel. P’esey a traha e plan di proyecto ‘Lesa cu placer’, cu e nota ‘Lesa pa bida largo’ den mente.
Meta
Proyecto Promocion di Lesamento tin como meta pa e muchanan den enseñansa primario, cu ta scol preparatorio y scol basico, incluyendo scol special, yega na lesa mas, miho y cu placer. Tambe pa conscientisa e publico general mas di e importancia di lesamento. E punto di enfoke ta ‘Lesa cu placer’.
Grupo meta
Nos grupo meta ta e muchanan den enseñansa primario. Pa nos yega na e muchanan di enseñansa primario, nos a dirigi e actividadnan riba e maestronan. Banda di esey, nos ta duna mayor y otro interesadonan tambe tips pa lesamento.
Grupo di trabou
E siguiente personanan a forma parti di e grupo di trabou: Angelique Maduro-Kerssens (coordinado), Maureen Molina-Luidens y Evelyn Ruiz-Croes. Evelyn ta merece un danki special pasobra el a aporta grandemente na e proyecto aki te na su pensioen na december 2014. Su pasion y amor pa literatura pa mucha ta hopi aprecia. Tambe kier a gradici Audrey Tromp-Wouters cu a yuda pone e Proyecto aki riba pia y pa su apoyo y e feedback cu el a duna como coordinado di Proyecto Idioma. Otro coleganan cu a forma parti di e grupo pa un temporada tabata Emanuel Ruiz y Marlon van der Linden. Alabes kier a gradici tur hende cu a aporta na e proyecto na un of otro manera.
Info / Contact
DEA > Proyecto Idioma den Enseñansa
Scroll To Top
