Biaha cu Mucha cu ta cay bou enseñansa obligatorio
Mi tin pensa di bay biaha cu mi yiunan cu ta cay bou enseñansa obligatorio. Kico mi tin di haci?
Como mayor/cuidado bo mester tuma contacto cu scol y informa nan ki dia, con largo y kico e meta di e biahe ta. E muchanan mester bay scol tur dia. Ta prohibi pa bay cu vakantie durante dianan di scol.
Den cierto caso si ta permiti pa biaha cu bo yiunan pa exterior, sigur si e biahe aki ta pa motibo personal of circunstancia extraordinario (manera enlace matrimonial, entiero den exterior, participacion den competencia deportivo internacional). P’esey ta di sumo importancia pa informa e scol bon y na tempo tocante e motibonan exacto di e biahe. Si e scol tin suficiente informacion, e scol ta registra e ausencia aki e ora como ausencia permisibel (door di uza codigo P).
Un alumno por keda pa aña escolar un maximo di 10 dia ausente pa motibo personal of circunstancia extraordinario.
Cerca ken mi por haya un formulario di peticion?
Bo por pidi un formulario di peticion cerca e cabesante di scol. Bo ta entrega e formulario completamente yena bek na e cabesante di scol.
E scol por desaproba un biahe/vakantie asina?
E scol por desaproba un biahe cu mayornan a pidi permiso p’e, si por ehempel e biahe tin solamente vakantie como meta. E scol tampoco lo duna permiso si door di e biahe e mucha lo keda mas hopi dia escolar ausente cu e scol por duna como codigo P. Mi ta bay biaha pa exterior y mi ta hiba mi yiunan cu mi sin tuma contacto cu scol.
Mi ta bay biaha pa exterior y mi ta hiba mi yiunan cu mi sin tuma contacto cu scol. Kico ta e consecuencianan pa mi?
E scol lo anota esaki como ausencia no permisibel. E empleadonan publico di enseñansa obligatorio lo actua y por duna bo un boet.
Kico e scol tin di haci den caso di ausencia no permisibel?
E scol mester raporta ausencia no permisibel cerca e empleadonan publico di enseñansa obligatorio.
Ki ora e scol mester notifica e ausencia no permisibel na e empleadonan publico di enseñansa obligatorio?
Despues cu e scol mes a tuma contacto cu e mayornan/ cuidadonan y no a bin ningun cambio den presencia escolar di e alumno.
Kico ta pasa si un mayor/cuidado no tene su mes na un palabracion?
E mayornan/cuidadonan por conta cu nan ta haya un boet.
Vakantie di Scol
Bo por haya e rooster oficial di vakantie, na scol di bo yiu of via website: > ea.aw > Vakantie di scol
Cu vakantie na Aruba
Mi ta cu vakantie na Aruba, mi ta cay bou di enseñansa obligatorio?
Si bo ta cu vakantie na Aruba, enseñansa obligatorio no ta conta pa bo.
Con nan ta mira esey?
Nan por mira esey door di e stempel di inmigracion den bo paspoort cu bo ta haya ora bo drenta Aruba.
