IPA ta celebra aniversario cu Congreso
Den cuadro di su di 25 aña di aniversario, Instituto Pedagogico Arubano (IPA) ta tene un congreso riba tereno di enseñansa titula “Transforming teachers for the XXI Century y Uplifting Leadership”.
IPA ta celebra su di 25 aña formando maestro pa enseñansa di Aruba. 25 aña pasa a desaroya un curiculo nobo cu tabata completamente diseña na Aruba mes introduciendo asina un concepto educativo nobo pa forma maestro.
Durante e 25 añanan IPA a conoce varios desaroyo. E demanda pa IPA ofrece mas estudio a aumenta. IPA a desaroya den un instituto cu ta ofrece estudio pa diferente nivel den enseñansa, di enseñansa preparatorio pa enseñansa avansa. A cuminsa cu estudio nobo cu nos no tabata conoce entre otro: Papiamento, Naturalesa y Tecnica
y e estudio di Movecion y Salud.
E demanda pa desaroyo profesional pa nos maestronan, e asina yama Lifelong Learning, a crece. Nos maestronan tabata y ta pidi pa curso y tayer riba diferente tereno.
Un di e metanan di nos Centro di Investigacion tabata pa facilita y trece conocemento di investigacion riba tereno relevante pa nos y asina a organisa diferente congreso grandi y chikito riba tereno di idioma, cultura, enseñansa, por ehempel pensamento critico. Esaki semper nos a haci hunto cu otro instituto na Aruba. Tabatin y ainda tin un pasion pa trece cambio, mehora nos enseñansa, aumenta e resultadonan y en especial sigui mehora e calidad di nos maestronan y e calidad di duna les.
Na aña 2013 IPA a ricibi e seyo di calidad di NVAO (Nederlands Vlaams Accreditatie Organisatie) cu ta nifica cu IPA su calidad ta comparabel cu e standard internacional den enseñansa.
Actualmente IPA ta forma parti di diferente proyecto nacional y internacional entre otro: Scol multilingual, Scol Saludabel, Conscious Discipline, the Council of Children Project (Kinderraad), Maestro Kompas y UNICARIB.
IPA ta participa activamente den diferente proyecto di innovacion pasobra ta hopi importante pa comparti, dialoga, desaroya y sigui innova.
Mirando atras, IPA tabatin hopi highlight, hopi reto y tambe hopi exito. Cu hopi orguyo IPA ta corda riba su studiantenan den tur tipo di posicion manera: parlamentario, onderwijskundigen, orthopedagogo, cabesante di scol y guia den enseñansa y naturalmente nos ta haya nan den nos scolnan pa eherce e profesion como maestro cu ta bira mas desafiante tur dia y cu tin biaha menos aprecia den nos comunidad.
Despues di 25 aña, IPA ta haya sumamente importante pa refleha riba: su historia, vision, su logronan, su retonan, e situacion actual y e rumbo cu kier tuma. IPA ta den pleno proceso di esaki.
Congreso
Den cuadro di IPA su di 25 aña di aniversario, IPA, den colaboracion cu Ministerio di Enseñansa, ta tene un congreso riba tereno di enseñansa. Esaki lo tuma luga dia 18, 19 y 20 di mei 2016.
E orado principal ta dr. Andy Hargreaves, mundialmente conoci riba tereno di innovacion di enseñansa.
Dr. Hargreaves ta e Thomas More Brennan Chair na Lynch School of Education na Boston College. Prome cu esey, e tabata e co-fundador y co-director di International Centre for Educational Change na e Ontario Institute for Studies in Education.
Dr. Hargreaves a skirbi y edita mas cu 30 buki di cua mayoria di nan a ricibi un premio di excelencia for di American Educational Research Association, the American Libraries Association, y the American Association of Colleges for Teacher Education.
Un di nan ta Capital Profesional, Transforming Teaching in Every School (cu Michael Fullan, 2012) a ricibi tres premio incluyendo e $100,000 Grawemeyer Award in Education na 2015.
Dr. Hargreaves ta traha como advisor den educacion pa e Premier di Ontario, e ta e fundador editorial di dos diario escolar, y ta Presidente electo di International Congress for School Effectiveness and Improvement. E ta obtene un Doctorado honorario di University of Uppsala di Swisa. Na januari 2015, el a clasifica number 6 como e experto cu mayor influencia riba politico estadounidense. Andy ta consulta cu organisacionnan y gobiernan di henter mundo. Su buki mas reciente ta Uplifting Leadership (with Alan Boyle and Alma Harris) published by Jossey Bass Business, 2014.
Website: [Andy Hargreaves]
Evento publico
Den cuadro di su di 25 aña di aniversario, IPA ta regala comunidad di Aruba un evento publico. Henter e comunidad di Aruba, particularmente alumni, tur profesional riba tereno di enseñansa y studiante di IPA ta keda cordialmente invita pa presencia e evento.
Capital Profesional
E orado principal pa e evento publico aki ta dr. Andy Hargreaves cu lo elabora riba e topico “Capital Profesional”, specificamente riba educador y formacion di educador. Andy Hargreaves y Michael Fullan a crea un agenda pa transforma e futuro di enseñansa y educacion publico. Capital Profesional tin como obhetivo combati tur argumento y stereotipo di educador y enseñansa a base di idea y evidencia, y di un manera strategicamente poderoso. E ta inclui guia pa yega na accion pa maestro, administradonan, scol y districto, y lidernan estatales y federales.
Exposicion
Alabes lo tin un exposicion titula “25 years Best Practices and Research in Education”. Meta di e exposicion ta pa expone un seleccion di tur e miho practicanan, investigacionnan y proyectonan cu IPA tawata envolvi cu nan den e ultimo añanan.
Como e prome institucion na nivel academico na Aruba cu ta cumpli cu e normanan di calidad di NVAO (Nederlands-Vlaamse Acreditatie Organisatie), IPA semper tabatin un rol di agente di cambio, y como tal, tabata forma parti integral di mayoria iniciativa di transformacion den area di enseñansa riba varios nivel.
Pa menciona algun di e iniciativanan: innovacion den enseñansa y desaroyo di idioma (Papiamento y multilingualismo), innovacion den didactica (scol preparatorio y basico), acercamento glocal (global-local) riba enseñansa, enseñansa integra y basa riba proyecto, internacionalisacion, profesionalisacion continuo di maestro, reconocemento di profesionalnan local na nivelnan academico.
E expo lo wordo presenta pa IPA su propio personal academico, studiantenan y alumni cu lo ta dispuesto pa elabora en breve riba e diferente proyectonan, como tambe dialoga cu esnan presente.
Proyectonan
- Investigacion y profesionalisacion continuo den cuadro di Proyecto Scol Multilingual (PSML)
- Innovacion basa riba contenido di Naturalesa y Tecnologia
- Investigacion den enseñansa, basa riba evidencia (evidence-based research in education (Mebit). Un variacion di investigacion riba tereno di matematica, idioma, musica, admicion di studiante y movecion y salud (M&S)
- Perspectiva Mundial BUS y Minor (incluyendo testimonio di studiante local y internacional)
- Desaroyo y innovacion di curiculo di IPA
- Modulo piloto tension y relahamento cerca mucha (M&S)
- Blended learning (Innovacion pa medio di tecnologia)
- Proyecto di finalisacion di Estudio (ASP)
- Proyecto social (SPR)
Lo clausura e anochi cu e tononan musical di e un banda sorpresa. E evento aki lo tuma luga diaranson dia 18 di mei 2016, di 6.30 di atardi pa 9.30 di anochi na IPA (Isaac Wagemakerstraat 11, San Nicolas). Entrada ta completamente pornada.
Patronisadornan cu ta haci congreso posibel
Un palabra di gratitud ta bay na e partronisadornan di e evento cu ta SETAR, WEB, Arubabank, FCCA, ELMAR y na diferente sponsor. Pa medio di nan sosten nan ta mustra nan compromiso y interes den nos enseñansa y den formacion di maestro. Sin nan sosten e evento lo no tabata posibel. Masha danki di curason.
Info / Contact
Pa mas informacion por busca den e alfabet menu riba homepage: [I] Instituto Pedagogico Arubano (IPA) of por tuma contacto cu: IPA.
Scroll To Top
