IPA a ricibi delegacion di Wayne State College
Recientemente, dr. Nicholas Shudak, decano di Wayne State College (WSC) di Nebraska (USA), y dr. Johanna Barnes, profesor na WSC, tabata na Aruba pa bishita un grupo di studiante cu ta sigui un estudio di Master of Science in Education di WSC.
Master of Science in Education (MSE):
Curriculum & Instruction – Instructional Leadership
WSC den colaboracion cu Instituto Pedagogico Arubano (IPA) a cuminsa na januari 2020 cu e prome cohort (Aruba1) di e programa Master of Science in Education (MSE): Curriculum & Instruction – Instructional Leadership. E grupo di 11 studiante ta consisti di algun maestro y cabesante di diferente scol basico, docente di Colegio Arubano y un experto den guia di e maneho di scolnan.
Riba e prome dia dr. Shudak y dr. Barnes a bishita algun scol caminda nan a haya un tour y splicacion di e vision y curiculo di e scolnan. Nan tabata hopi impresiona cu e dedicacion y creatividad cu nan a mira.
Siguientemente, nan a reuni cu e directora di IPA, drs. Marilyn Richardson, y e dos facilitadonan di e programa di MSE na Aruba, esta Darrelyn Maduro (MSc) y Roke Hoen (MSc).
Encuentro cu Directivanan di Scol y Minister
Atardi tabatin un encuentro interesante cu e directivanan di scol. E tremendo presentacionnan di dos studiante, esta Emilaine Giel (maestro) y Sherissa Tsu (cabesante), a convence e directivanan di e importancia di e programa cu su conceptonan, pedagogia, didactica y e maneranan pa pensa y siña innovativo, cu ta pas bon cu nos PEN 2030 y nos alumnonan na Aruba. E directivanan a mustra hopi interes pa e programa sigui pa otro maestro/docente por haci e estudio aki.
Tambe Dr. Shudak y dr. Barnes tabata tin un combersacion cu Minister di Enseñansa, sr. Endy Croes, y Minister Plenipotenciario na Merca, mr. Joselin Croes.
E di dos dia nan a bishita IPA pa topa cu e 11 studiantenan di e community of learning MSE cohort Aruba1. E grupo aki ta cuminsa pronto cu nan ultimo fase, cu ta na caminda pa nan graduacion. Nos bishitantenan tabata impresiona cu e motivacion y nivel di e grupo cu mester sigui e estudio na ingles y tambe skirbi nan Action Research na Ingles.
Facilitators professional development
E ultimo dia dr. Barnes, cu tambe ta e Program Mentor di e facilitadonan di e estudio aki na Nebraska y Aruba, a organisa un ‘facilitators professional development meeting’ cu Roke Hoen y Darrelyn Maduro. Cada luna tin online facilitator professional development meeting. Asina WSC kier garantisa e calidad di e programa cu e modelo specifico di ‘community of learning’.
Interes?
Bo a haya interes den e estudio aki?
Prome cu fin di aña dr. Shudak y dr. Barnes ta planea pa bin Aruba bek pa un encuentro di informacion organisa hunto cu IPA pa recluta y papia cu futuro studiantenan (maestro, cabesante y docentenan) cu ta interesa.
Keda pendiente pa mas informacion.
Info / Contact
Pa mas informacion por busca den e alfabet menu riba nos pagina principal:
Por tuma contacto cu:
Scroll To Top
