Inventarisacion pa Enseñansa Primario Arubano

March 16, 2023

Departamento di Enseñansa Aruba (DEA) tin e tarea pa traha un maneho integral pa enseñansa primario, pues pa muchanan di 4 pa 12 aña di edad.

Actualmente DEA ta den e fase di inventarisacion/analisis pa formula un analisis integral, hunto cu tur interesado cu tin relacion directo of indirecto cu enseñansa primario. A base di e resultadonan di e analisis aki lo fiha maneho y condicion cu mester t’ey pa por innova nos enseñansa den un forma responsabel y cu ta tene cuenta cu nos contexto.

Inventarisacion hunto cu un proceso di analisis ta importante pa motibo cu ya tin maneho aproba cu ya caba ta den fase di ehecucion. Por menciona por ehempel maneho riba Scol Arubano Multilingual cu ta e.o. implementacion di e metanan nucleo aproba desde 2018. Tambe por menciona e acercamento di enseñansa multilingual basa riba idioma materno cu tambe ta aproba.

E maneho integral pa enseñansa primario mester sali for di e Plan Educacion Nacional 2030 (PEN 2030) cu ta un maneho strategico general di enseñansa cu ta formalisa. Cu desaroyo di e maneho integral pa enseñansa primario lo traha un nota (startnotitie) pa por renoba e leynan actual di enseñansa preparatorio y basico cu entre tanto ta data di siglo pasa. Ley ta un di e condicionnan pa enseñansa di calidad tuma luga. Renobacion y desaroyo di ley di enseñansa na Aruba ta prioridad di e minister encarga cu enseñansa di Gabinete Wever-Croes 2.

Tambe ta sigui recomendacion 11 stipula den e rapport di e estudio di inspectoria di enseñansa Arubano y Hulandes. E inventarisacion ta tuma luga door di e.o. rondanan di consulta cu diferente interesadonan di enseñansa, manera directivanan di scol, cabesante, maestro di scol preparatorio y basico, organisacionnan no gubernamental y organisacionnan gubernamental. Ademas lo bay consulta cu e mucha mes y mayornan. E proceso di inventarisacion a inicia 21 di februari 2023 y lo continua durante e simannan venidero.