Inscripcion pa Naturalisatietoets 2019
Seccion Examenbureau di Departamento di Enseñansa Aruba ta informa cu e prome ronda di inscripcion pa e Prueba di Naturalisacion (Naturalisatietoets) pa aña 2019 ta habri entrante dia 7 di januari 2019.
E Prueba di Naturalisacion ta tuma luga dos biaha pa aña. E prome ronda di inscripcion ta na luna di Januari, mientras cu e di dos ronda ta na luna di Augustus.
Inscripcion pa e prome ronda ta tuma luga desde dia 7 di januari te cu dia 24 di januari 2019.
Pa aplica pa e Prueba di Naturalisacion mester haci uzo di e formulario di aplicacion cu ta obtenibel pa download for di riba e website Enseñansa Aruba [ea.aw]. Aki tambe por haya e foyeto di informacion.
Prueba di Naturalisacion desde 1 di januari 2011 ta consisti di 1 componente di conocemento di nos comunidad y structura estatal, 4 componente di idioma Papiamento y 4 componente di idioma Hulandes.
Departamento di Enseñansa Aruba pa medio di su Examenbureau ta encarga specificamente cu e prueba y no tin ningun participacion den henter e proceso di naturalisacion.
Pa informacion relaciona cu e Prueba di Naturalisacion por tuma contacto cu Examenbureau, mientras cu pa naturalisacion mester tuma contacto cu Gabinete di Gobernador di Aruba.
Info / Contact
Pa mas informacion por busca [N] Naturalisatietoets of [P] Prueba di Naturalisacion den e alfabet menu riba homepage of por tuma contacto cu DEA | Examenbureau
Scroll To Top
