Innovacion a resalta durante “The Future of Education”
Recientemente a clausura e “Siman di Enseñansa” cu e evento “The Future of Education”. Un evento caminda comunidad por a haya un bista di e desaroyonan cu ta tuma luga riba tereno di enseñansa na Aruba. Esaki a keda organisa den cuadro di e Plan Nacional pa Enseñansa 2030.
Na final di aña 2017 Minister di Enseñansa sr. dr. Armando Lampe a encarga Departamento di Enseñansa Aruba (DEA) cu e desaroyo di e siguiente Plan Nacional pa Enseñansa, caminda hunto cu tur stakeholder mester yega na un vision comun pa enseñansa na Aruba pa aña 2030.
Meta di e “Siman di Enseñansa” tabata pa informa, educa y dialoga riba enseñansa na Aruba y conhuntamente pensa con nos por garantisa enseñansa di calidad cu ta prepara nos pa futuro.
E “Siman di Enseñansa” a consisti di diferente evento: un apertura oficial na Instituto Pedagogico Arubano (IPA), rondanan di consulta cu cabesante di scol, un ronda di discusion na Universidad di Aruba (UA) cu e topico “Calidad di Enseñansa 2030” y un encuentro na Colegio EPI cu a enfoca riba e topico “Education and the Future of Work”.
E evento “The Future of Education” a tuma luga na Plaza Padu y a conta cu participacion di un cantidad di organisacion cu ta traha riba tereno di educacion na Aruba manera Tienda di Educacion, Asociacion Trabou di Hubentud na Aruba (ATHA), Traimerdia & Nos Atardi, Fundacion Muchila Creativo y Stichting Protea.
Riba tereno di enseñansa Dienst Inspectie van het Onderwijs, Bureau Leerplicht, como tambe e directiva di scol mas grandi na Aruba, esta Stichting Katholiek Onderwijs Aruba (SKOA) tabata presente pa comparti informacion, y Scol Dununman, EPB y Colegio EPI cu best practices.
Departamento di Enseñansa Aruba (DEA) tabatin diferente stand cu informacion di entre otro Examenbureau, pero tambe exposicion di material di Desaroyo di Curiculo y Proyecto Idioma, den Enseñansa.
Durante “The Future of Education” mas cu tur kier a enfoca riba e mucha y e hobennan. Nos mundo ta cambiando lihe. Tecnologia lo hunga un rol primordial den futuro. Nos muchanan lo tin trabounan cu awe no ta exisiti ainda y pa esaki lo tin mester di habilidanan nobo.
E Mobile Makerspace (bus di ciencia) tabata presente pa duna tur mucha y hoben e oportunidad di explora y experimenta cu tecnologia. Christie Mettes a papia tocante e 21st century skills y a splica e idea tras di e Mo-B Lab (mobile makerspace), mientras cu Manuel Rojas a presenta e B-Lab (library makerspace). Ambos ekipa cu e ultimo tecnologianan manera 3D printers, computers pa coding, Internet-of-Things y robotics. Ambos proyecto a keda concretisa den un colaboracion entre Biblioteca Nacional y Metabolic Foundation, conoci como “Brenchie’s Lab”.
E hobennan di FUTURA, e Aruba Government Innovation Lab, hunto cu Ivo Dongen, Manager IT Applicaties na SETAR, a elabora riba e proyecto “Hour of Code”. Un proyecto cu den un (1) ora ta siña e mucha e base di “coding” y “programming” den forma di wega riba computer, pa asina introduci e mucha na “computer science” cu e meta pa stimula su interes den e area aki.
E proyectonan aki ta algun ehempel di instrumentonan educativo y innovativo pa ekipa nos futuro generacion cu e habilidadnan pa enfrenta e retonan di futuro.
Tim Croes, di Universidad di Aruba, a presenta e “virtual reality bril” como tambe ehempel di un “virtual classroom” (digitale leeromgeving), caminda esnan presente por a experencia un forma nobo di siña.
E hobennan a haya e oportunidad pa vocifera nan opinion y ideanan como tambe pa presenta nan arte den diferente forma: Alumnonan di EPB y EPI a demostra nan arte culinario, muchanan di grupo di baile Nos Fofoti a presenta algun baile folklorico y Stichting Protea a presenta un obra teatral cu a trata prevencion di abuso sexual di mucha/hoben, cual material ta bay scol.
Tabatin canto y musica di e hobennan Valentina Dania, Zygion Croes y Chris Angela y steel pan di Marver Guedez di Fundacion Muchila Creativo. Massive Brassband a presenta e ritmo di asambeho, mientras cu Daniel Willems, un hoben cu ta visualmente limita, a presenta algun cantica riba keyboard. E hoben Amanda Britten a presenta mensahenan a traves di algun poema y su deseonan pa NOP 2030.
E programa a conta tambe cu presentacion di e proyecto “Poder di Hubentud” di ATHA.
Un momento remarcabel di e anochi tabata ora cu algun mucha y hoben a haya e oportunidad pa haci algun pregunta na e actual Minister di Enseñansa sr. dr. Armando Lampe. E preguntanan a keda formula cu ayudo di Kevin Illes.
Durante e evento esnan presente por a participa na un “live digital poll” di Departamento di Enseñansa caminda a haci e preguntanan: Enseñansa di calidad: Kico ta e prome palabra cu ta drenta bo mente? Kico ta e puntonan di atencion pa logra un enseñansa di calidad? Kico bo lo kier wak den e vision di enseñansa?
E hobennan Leo Philips y Kasey Wever a fungi como maestronan di ceremonia pa e evento aki.
“The Future of Education” tabata un evento pa henter famia por informa nan mes y pa e topico bira uno cu no solamente ta wordo discuti riba nivel di gobierno of entre stakeholders, pero tambe na cas.
Por wak e “live stream” di ful e evento bek riba nos facebook page @EducationAruba.
Proceso participativo
Pa por formula e siguiente Plan Nacional pa Enseñansa a scoge pa un proceso participativo unda tur actor por a duna nan contribucion.
Sr. dr. Armando Lampe na momento di a asumi e posicion di Minister di Enseñansa, a tene multiple ronda di consulta introductorio cu diferente actor den enseñansa pa haya un bista di e puntonan di atencion.
Departamento di Enseñansa siguientemente a organisa diferente sesion hunto cu Dienst Inspectie como tambe e Directivanan di Scol pa analisa e NOP anterior, esta 2007-2017.
A tene consulta cu stakeholders di e sector social, economico y di medio ambiente, como tambe cu esnan cu ta representa e mucha y hobennan, pa haya mas informacion di e desaroyo general, tanto actual como pa futuro, y tanto na Aruba como internacional.
A tene diferente ronda di consulta cu e cabesantenan di scol pa nan por vocifera nan puntonan di atencion pa enseñansa como tambe e elementonan cu nan lo kier wak bek den e vision pa Enseñansa 2030.
Cu sosten di Centraal Bureau Statistiek (CBS) a conduci dos encuesta: e prome cerca e personal di scol, esta e maestro y e docentenan kendenan sigur ta un actor sumamente importante den e proceso aki. E di dos encuesta tabata pa e comunidad completo.
Actualmente e comision encarga cu e Plan Nacional pa Enseñansa ta finalisando e analisis. Pa esaki a scoge pa traha cu e asina yama “General Eduaction Quality Analysis Framework” desaroya pa UNESCO. Finalmente lo formula e vision pa enseñansa na Aruba pa aña 2030.
A scoge aña 2030 pa motibo cu pais Aruba a uni su mes na e agenda 2030 pa desaroyo sostenibel fiha pa United Nations (UN). Esaki ta un compromiso pa traha na e Sustainable Development Goals (SDG’s) pa cual tin 17 meta cu kier logra na aña 2030, entre nan: Enseñansa di Calidad (SDG 4).
Ministerio y Departamento di Enseñansa ta gradici un y tur cu den un forma of otro a colabora of participa na e “Siman di Enseñansa” como tambe pa tur input brinda na nos proximo Plan Nacional pa Enseñansa 2030.
Info / Contact
Pa mas informacion por busca [N] NOP 2030 den e alfabet menu riba homepage.
Scroll To Top
