Gabinete di Aruba na Hulanda ta dialoga cu studiantenan
Gabinete di Minister Plenipotenciario na Hulanda (Arubahuis) a organisa “Ban Topa”, diferente sesion cu studiantenan di Aruba na Hulanda.
Ban Topa cu studiantenan di Amsterdam y Utrecht
3 october 2024
Gabinete di Minister Plenipotenciario a tene un exitoso Ban Topa cu studiantenan for di Amsterdam y Utrecht. Na The Team Building na Utrecht un cantidad di trinta (30) studiante a participa na e Ban Topa cu a consisti di un seccion di dialogo conduci pa directora di Gabinete di Aruba Joselin Croes LL.M/M.Sc. A toca temanan manera e preparacion na Aruba; nan idea y pensamento riba e tarea di Gabinete di Aruba. Tambe a puntra e studiantenan ki tipo di actividadnan nan ta desea pa keda organisa; kico ta e retonan cu nan a bin ta confronta na Hulanda.
Durante di e dialogo aki e grupo di studiantenan por a duna contesta riba e preguntanan y asina recoge pensamentonan, ideanan y sugerencianan unda Gabinete di Aruba lo por sigui traha riba maneho hunto cu ministerio di Enseñansa di Aruba pa stimula e desaroyo y bienestar di studiantenan di Aruba na Hulanda.
Gabinete di Minister Plenipotenciario por mira bek riba un Ban Topa hopi exitiso, na unda pa medio di dialoga a tene un intercambio habri cu e studiantenan pa asina sigui conecta y reforsa y relacion entre Gabinete di Aruba y studiantenan Arubiano.
Ban Topa na Eindhoven
14 november 2024
Gabinete di Minister Plenipotenciario a tene un biaha mas un exitoso Ban Topa cu studiante, e biaha aki na Eindhoven. E encuentro aki tabata pa studiantenan for di e region di Brabant y Limburg cu ta inclui ciudadnan manera Tilburg, Breda, Eindhoven, Sittard y Maastricht. E Ban Topa aki a conta cu mas di 30 studiante.
E programa a cuminsa cu un discurso di Minister Plenipotenciario demisionario mr. Ady Thijsen den cual ela apunta e importancia di e encuentronan aki pa asina por mehora e guia di studiantenan na Hulanda. Tambe e mandatario a bolbe haci un apelacion na e studiantenan pa nan pensa pa regresa Aruba despues di nan estudio. Sr. Thijsen a reconoce cu tin hopi trabou ainda pa haci di parti di e doñonan di trabao sea Gobierno of sector priva. Nan mester por brinda alternativa na studiantenan cu ora nan caba di studia nan por haya trabou cu un bon salario y bon beneficionan secundario. “Aruba mester duna nos hobennan profesional un perspectiva pa regresa nan pais, cuminsa cu un carera profesional y asina cuminsa un biba na Aruba,” tabata palabranan di Minister Thijsen.
E seccion di dialogo tabata den man di coordinadora di departamento di Enseñansa, Bienestar General y Cultura, sra. Ivonne Navas, hunto cu directora di Gabinete di Aruba sra. Joselin Croes LL.M/M.Sc. Mescos cu den e casonan di e otro sesionnan di Ban Topa, aki a toca temanan manera e preparacion na Aruba; nan idea y pensamento riba e tarea di Gabinete di Aruba. Tambe a puntra e studiantenan ki tipo di actividadnan nan ta desea pa keda organisa; kico ta e retonan cu nan a bin ta confronta na Hulanda.
Durante di e dialogo aki e grupo di studiante por a duna contesta riba e preguntanan y asina recoge pensamentonan, ideanan y sugestionnan unda Gabinete di Aruba lo por sigi traha riba maneho hunto cu ministerio di Enseñansa di Aruba pa stimula e desaroyo y bienestar di studiantenan Arubiano na Hulanda.
Gabinete di Minister Plenipotenciario ta hopi contento cu e Ban Topa na Eindhoven un biaha mas a confirma e nesesidad di tin dialogo cu e studiantenan pa asina sigi conecta y reforza y relacion entre Gabinete di Aruba y studiantenan di Aruba na Hulanda.
Ultimo Ban Topa na Arnhem /Nijmegen
19 november 2024
Na Hogeschool van Arnhem y Nijmegen (HAN) Gabinete di Minister Plenipotenciario a tene su ultimo Ban Topa. E encuentro aki tabata pa studiantenan cu ta studia na Arnhem, Nijmegen y Wageningen.
E programa a cuminsa cu un introduccion di directora di Gabinete di Aruba Joselin Croes LL.M/M.Sc. E sesion di “Brainstorm” a keda dirigi pa coordinadora di departamento di Enseñansa, Bienestar General y Cultura Ivonne Navas conhunto cu Joselin Croes.
Durante e sesion di Ban Topa aki tambe a toca temanan manera e preparacion na Aruba; nan idea y pensamento riba e tarea di Gabinete di Aruba. Tambe a puntra e studiantenan ki tipo di actividadnan nan ta desea pa keda organisa; kico ta e retonan cu nan a bin ta confrontando na Hulanda.
E grupo studiante aki mescos cu e otro gruponan a haya pregunta riba cual nan por a duna contesta, pensamento, remarca, ideanan y sugerencianan unda Gabinete di Aruba lo por sigi traha riba maneho hunto cu ministerio di Enseñansa di Aruba pa stimula e desaroyo y bienestar di e studiantenan di Aruba na Hulanda.
Por bisa cu tur e encuentronan a brinda Gabinete di Aruba hopi informacion valioso. Joselin Croes a bisa cu aña 2024 tabata uno pa scucha y tende di e studiantenan kico ta nan preocupacionnan, y kico ta nan deseo pa yuda nan den nan periodo como studiante aki na Hulanda. Tambe sra. Croes a bisa cu algun punto cu a bin dilanti ta puntonan cu mester keda implementa na Aruba prome cu e studiante yega Hulanda. Gabinete di Aruba lo traha riba un lista di prioridad pa organisa actividadnan na 2025.
