FAQ
Arubalening y Studiamento
Con mi por aplica pa Arubalening?
- Desde aña 2017 studiantenan cu ta desea di bin na remarca pa un Arubalening mester aplica pa esaki via di e Arubalening Portal;
- E prome stap ta pa registra pa un Arubalening Account. Cu e Arubalening Account e studiante por login den e Arubalening Portal y sigui cu e procedura di aplicacion pa un Arubalening.
Unda por haya guia pa scoge un estudio?
Unda mi por acudi pa informacion tocante cancelacion di e prestamo di Arubalening (pago di e debe)?
Mas pregunta tocante Arubalening?
- Tur informacion tocante Arubalening ta publica riba nos website: [ea.aw > Arubalening].
- Si tin mas / otro pregunta mester tuma contacto cu afdeling Studiefaciliteiten cu ta encarga cu Arubalening via tel 528 3400 of email arubalening@ea.aw.
- Ta recomenda pa sigui nos facebook page pa keda na altura: [facebook.com/educationaruba].
Curso
Cua ta e curso(nan) cu ta ofrece? Ki tempo e curso(nan) lo tuma luga?
- Enseñansa pa Empleo (EPE) ta e instancia di Gobierno cu ta percura pa brinda diferente curso.
- Pa mas informacion mester tuma contacto cu: Enseñansa pa Empleo
- Facebook page Enseñansa pa Empleo: [facebook.com/EPEAruba]
Diploma
Unda por laga certifica (waarmerk) diploma?
- Certificacion di un diploma ta nifica cu un instancia ta declara (of certifica) cu e contenido di e copia ta coresponde cu e diploma original y cu esaki ta pertenece na e sistema di enseñansa (legalmente) reglamenta di e pais. Na Aruba, Dienst Inspectie van het Onderwijs ta certifica diploma(nan) obteni y cu ta pertenece na e sistema di enseñansa legalmente reglamenta na Aruba.
- Pa mas informacion y/of pa laga certifica (waarmerk) diploma mester acudi na: Dienst Inspectie van het Onderwijs.
Kico un persona por haci den caso cu e perde su diploma?
- Personanan cu perde un diploma cu ta pertenece na e sistema di enseñansa legalmente reglamenta na Aruba mester tuma contacto cu Examenbureau na Departamento di Enseñansa Aruba.
- E persona lo haya un declaracion di Examenbureau den cual tin para e diploma/nivel di estudio cu el a logra obtene segun e sistema educacional legalmente reglamenta na Aruba cu lo reemplasa e diploma original.
- Pa mas informacion mester tuma contacto cu: Examenbureau.
Enseñansa pa Adulto
Kico Aruba ta haci riba tereno di Educacion pa Adulto?
Idioma
Ki tempo lo cuminsa cu e Scol Arubano Multilingual (SAM)?
- Na inicio di aña 2018 Minister di Enseñansa, dr. Armando Lampe a anuncia cu Aruba lo conoce un cambio den enseñansa; ta trata di implementacion di Scol Multilingual den tur scol preparatorio y basico na Aruba. SAM ta e nomber oficial di e programa y e curiculo nobo multilingual cu lo keda implementa den scol primario. Na aña 2018–2019 tur klas, cuminsando di scol preparatorio te cu klas 6 di scol primario di e scolnan piloto, lo forma parti di e programa multilingual. Cu e implementacion di Scol Multilingual den tur scol na Aruba e scolnan piloto (Proyecto Scol Multilingual – PSML) lo sigi desaroya prome cu e otro scolnan y nan ta un partner (banda di directivanan (schoolbesturen), CDPC di IPA y DEA) den e implementacion di SAM den e otro scolnan preparatorio y basico.
Un mucha chikito por siña 4 idioma pareu?
- Aruba ta un isla multilingual. E modelo ta refleha nos situacion. E cuater idiomanan mas uza na Aruba ta den e modelo. Nos muchanan ta multilingual caba prome cu nan drenta scol preparatorio. Loke e scol multilingual ta haci, ta sigui desaroya e multilingualismo cu e mucha ta bin cu ne. Sinembargo no ta e idea pa pone un peso demasiado grandi riba nos chikitinnan. P’esey ta cuminsa na un manera simpel y agadabel pa den forma di wega stimula cu e muchanan por sigui desaroya nan conocemento di e 4 idiomanan Papiamento, Hulandes, Ingles y Spaño.
Si introduci Papiamento na scol, esaki lo bay stroba desaroyo di Hulandes?
- Al contrario! Un bon dominio di Papiamento ta un condicion pa un bon dominio di Hulandes. Den e scol multilingual e alumno ta siña Hulandes den un forma agradabel desde edad di 4 aña. E ta desaroya su conocemento di palabra y nan nificacion na Papiamento y na Hulandes. E ta siña lesa na Papiamento y despues tambe na Hulandes. E ta sigui desaroya su conocemento di gramatica y su habilidadnan di scol na Papiamento y na Hulandes. Asina ora e alumno haci e stap pa bay cuminsa uza Hulandes como idioma di instruccion, e lo haci esaki cu hopi mas confiansa propio y cu un fundeshi mucho mas fuerte.
Con e scol multilingual ta prepara e alumno pa bay studia afo?
- Siñando tur 4 idioma y stimulando e alumno pa no siña solamente fo’i cabes, pero pa compronde tambe loke e ta siña y compara esaki cu loke e sa caba, e alumno ta ricibi un caha yen di herment pa e por sigui desaroya su mes den su futuro estudio, sea na Aruba mes of den exterior. Den e scol multilingual e alumno ta siña di trempan pa haci bon uzo di diferente medio na diferente idioma – manera television, computer of buki – pa e por siña cos nobo. Unabes cu e alumno yega e edad cu e ta scoge su futuro carera escolar, e alumnonan cu a ricibi e fundeshi multilingual lo ta miho prepara pa por scoge un di e tantisimo estudionan na Ingles, pero tambe pa por scoge un estudio na Aruba mes of den exterior na sea Papiamento, Hulandes of Spaño.
Unda por haya mas informacion tocante (uzo corecto di) Papiamento?
- Riba e website [papiamento.aw] por haya mas informacion tocante ortografia y gramatica di Papiamento, por lesa informacion general tocante Papiamento, por download un lista di palabra segun e ortografia amplia di 2009 of haci uzo di e “spelling checker” [busca palabra].
- Tambe por download un lista di publicacion na Papiamento y por haya mas informacion scientifico tocante e idioma Papiamento.
Mas pregunta tocante Scol Arubano Multilingual?
- Informacion tocante Scol Arubano Multilingual (SAM) ta publica riba nos website: [ea.aw > SAM].
- Si tin mas / otro pregunta por manda un email na: sam@ea.aw.
- Ta recomenda pa sigui nos facebook page pa keda na altura: [facebook.com/ScolArubanoMultilingual].
Landsexamen
Unda mi por haya informacion tocante Landsexamen?
- Pa tur informacion di Landsexamen por acudi na nos website [ea.aw] y busca Landsexamen den e alfabet menu.
- Aki tur informacion y e documentonan di Landsexamen manera e informatiebrochure, e inschrijvingsformulier, examenreglement, tijdschema, roosters, examenprogramma’s y oefenmateriaal ta publica: [ea.aw > Landsexamen].
Con / ki tempo mi por inscribi pa Landsexamen?
- Inscripcion pa Landsexamen MAVO, HAVO y VWO ta tuma luga tur aña na luna di september.
- Tur informacion como tambe e Formulario di Inscripcion ta publica riba nos website: [ea.aw > Landsexamen].
Mi por haci Landsexamen HAVO si mi no tin un MAVO-diploma?
- Si, participacion na Landsexamen ta mara na edad (y no na “vooropleiding”).
- Pa mas informacion di e rekisitonan di participacion na Landsexamen mester lesa e Informatiebrochure Landsexamen: [ea.aw > Landsexamen].
Cuanto e ta costa pa participa na Landsexamen?
- E examentarieven y informacion di termino di pago ta publica den e Informatiebrochure Landsexamen: [ea.aw > Landsexamen].
Mas pregunta tocante Landsexamen?
- Tur informacion tocante Landsexamen ta publica riba nos website: [ea.aw > Landsexamen].
- Si tin mas / otro pregunta mester tuma contacto cu Examenbureau cu ta encarga cu Landsexamen via tel 528 3400 of email landsexamen@ea.aw.
- Ta recomenda pa sigui nos facebook page pa keda na altura: [facebook.com/educationaruba].
Leerplicht
Ken ta cay bou di Enseñansa Obligatorio (Leerplicht)?
- Enseñansa obligatorio ta conta pa e mucha/hobennan cu ta biba na Aruba;
- Enseñansa obligatorio ta cuminsa riba e prome dia di scol di e aña escolar den cual e mucha tin por lo menos 4 aña riba dia 1 di october. Esey ta nifica cu no ta solamente mucha cu tin 4 aña na comienso di aña escolar mester bay scol, tambe esun cu ta haci 4 aña pa mas tarda 1 di october. Mucha cu ta haci 4 aña despues di e prome dia escolar pero ultimamente 1 di october ta obliga pa bay scol tambe.
- Enseñansa obligatorio ta conta te dia e alumno cumpli 17 aña, of te ora cu e alumno termina un estudio den enseñansa profesional of enseñansa secundario general.
Ley di Enseñansa Obligatorio ta conta tambe pa e mucha special of e mucha cu ta ilegal na Aruba?
- Si, e ley di Enseñansa obligatorio ta conta pa tur mucha cu ta biba na Aruba. Pues e ta conta tambe pa e mucha(nan) special y e mucha(nan) cu ta ilegal na Aruba. Nan tambe tin derecho riba enseñansa.
- E empleadonan publico di enseñansa obligatorio lo controla solamente si e mucha ta bay scol.
Mas pregunta tocante Leerplicht?
Prueba di Naturalisacion | Naturalisatietoets
Con / ki tempo mi por inscribi pa e Naturalisatietoets?
- E Prueba di Naturalisacion ta tuma luga dos biaha pa aña. Aplicacion ta tuma luga na luna di januari y luna di augustus cada aña. E fechanan exacto ta keda publica riba nos website como tambe den medionan di comunicacion.
- Tur informacion como tambe e Formulario di Aplicacion ta publica riba nos website: [ea.aw > Naturalisatietoets].
- Ta recomenda pa sigui nos facebook page pa keda na altura: [facebook.com/educationaruba].
Mas pregunta tocante e Naturalisatietoets?
- Tur informacion tocante e Prueba di Naturalisacion ta publica riba nos website: [ea.aw > Naturalisatietoets].
- Si tin mas / otro pregunta tocante e Prueba di Naturalisacion mester tuma contacto cu Examenbureau via tel 528 3400 of email naturalisatietoets@ea.aw.
- Examenbureau (DEA) ta encarga solamente cu e prueba y no tin ningun participacion den henter e proceso di naturalisacion.
- Pa informacion of pregunta relaciona cu e proceso di naturalisacion mester tuma contacto cu Gabinete di Gobernador di Aruba.
Vakantie
Unda mi por haya e fechanan oficial di Vakantie di Scol / Schoolvakantieroosters?
- Departamento di Enseñansa Aruba (DEA) ta traha e concept vakantierooster y ta stipula e ATV-dagen pa “Onderwijspersoneel”.
- Dienst Inspectie van het Onderwijs, Directivanan di Scol y SIMAR ta haya esakinan pa duna nan input.
- Finalmente e proposicion ta bay pa Minister di Enseñansa di Aruba pa aprobacion.
- Na momento cu tin e aprobacion oficial di minister, e Vakantierooster y e ATV-dagen pa “Onderwijspersoneel” ta keda publica riba nos website: [ea.aw > Vakantie].
Scroll To Top
