Evento di clausura di programa OGM
E aña academico 2015-2016 di Universidad di Aruba a clausura oficialmente dia 17 di juni pa e studiantenan di Organization Governance and Management (OGM). Anualmente e estudio OGM ta celebra e clausura di aña academico cu un evento pa evalua e aña y aprecia tur esfuerzo cu studiantenan a desplega.
 |
E aña aki e evento a tuma lugar na e Acomodacion Multifuncional di Noord (MFA Noord). E slogan di e dia tabata “Refleha riba pasado pa prepara pa futuro”. E meta tawata pa e studiantenan refleha riba nan desaroyo pa asina nan por pone metanan nobo pa sigui crece y desaroya den e areanan personal, academico y profesional.
Ademas studiantenan den e di dos aña a presenta nan proyectonan pa e modulo Community Project. E presentacionnan tabata hopi interesante. E studiantenan a demonstra claramente cu nan por a combina teoria cu practica y den e mesun rosea nan por a contribui na proyectonan den nos communidad. Den e cuadro aki studiantenan a colabora cu e sigiuente fundacionan cu ta Fundacion Padu, Fundacion Museo Arubano, Switch Foundation y ATHA (Asociacion Trabou pa Hubentud na Aruba). Tambe un grupo ta trahando un investigacion preliminario pa e proyecto Alimento di Minister di Asuntonan Social.
E team di Organization Governance and Management ta felicita tur e studiantenan di UA y di Aruba cu a pasa tur nan modulonan, a bay over y esnan cu a gradua na scolnan secundario. Tambe ta felicita especialmente studiantenan di OGM mes cu ta preparando pa gradua den luna di juli.
Por ultimo ta haci uzo di e oportunidad pa gradici e empleadonan di MFA pa e bon trato y hospitalidad cu nan a brinda e studiantenan y docentenan di OGM.
Pa mas informacion di e estudio di OGM por bishita e pagina di web di Universidad di Aruba: ua.aw/OGM.
 |
Info | Contact
Pa mas informacion por busca den e alfabet menu riba homepage: [University of Aruba] of por tuma contacto cu: [University of Aruba].
Scroll To Top
