Studiantenan di IPA a bishita Parlamento y Gobierno di Aruba
Recientemente studiantenan di aña tres di Instituto Pedagogico Arubano (IPA) a haci un bishita na Parlamento di Aruba pa di prome biaha.
 |
E bishita aki tabata den cuadro di Perspectiva Mundial (PM), un periodo di mey aña, den cua e studiantenan di IPA ta orienta tocante durabilidad y globalisacion – e.o. pa loke ta trata enseñansa. E bishita aki na Parlamento sa tuma luga semper prome cu nan Pasantia Internacional den exterior. |
Durante preparacion pa e bishita na Parlamento, nan a haya preparacion for di e cuerpo di docente di PM a base di e 4 P-nan (Planet, People, Profit & Participatory Governance). E bishita na Parlamento tabata den cuadro di Participatory Governance (Gobernacion Participativo). E parti aki ta bou di coordinacion di dr. Paula Kibbelaar. Sr. Armand Hessels y sr. Tyson Lopez a duna un charla tocante ciudadania activo, comunitarismo y bon gobernacion (good governance).
 |
Prome cu e studiantenan a bishita Parlamento, nan a haya un introduccion y recorido den e edificio Cocolishi. Siguientemente nan por a haci diferente pregunta na e miembronan di Staten den Sala di Parlamento. SDG-team, bou di direccion di presidente Joycelyne Croes y Ghislaine Nicolaas (boluntario) y Minister President sra. Evelyn Wever-Croes a percura pa un introduccion. Minpres a duna un introduccion cla y up to date di e vision y e futuro plannan di gobernacion pa garantisa bon gobernacion, tambe pa promove integridad di e accionnan di gobernacion.
 |
Fin di e siman aki e studiantenan di IPA ta biaha pa Costa Rica, Spaña (Barcelona), Hulanda (Den Haag y Rotterdam) Belgica (Antwerpen) y Merca (New York y Baltimore/Towson) pa asina cumpli cu nan pasantia internacional. Durante nan pasantia internacional e studiantenan lo haci nan investigacion a base di e tareanan ricibi for di IPA, excursion na diferente instituto, tayer na e universidadnan y haci entrevista cu persona renombra den ramo di sostenibilidad. Naturalmente e studiantenan lo bishita diferente scol basico y preparatorio p’asina nan mira con ta duna forma na sostenibilidad den enseñansa.
 |
Despues di nan regreso, e studiantenan lo haci investigacion na nan scol di practica aki na Aruba y tambe e studiantenan ta traduci loke nan a siña na IPA y den exterior den e lesnan cu nan lo duna na nan scol di practica. Nan lo haci comparacion entre e dos paisnan y presenta e resultadonan den luna di april na henter e comunidad di Aruba, specialmente na esnan den enseñansa.
Info | Contact
Pa mas informacion por busca den e alfabet menu riba homepage: [I] Instituto Pedagogico Arubano (IPA) of por tuma contacto cu: IPA.
Scroll To Top
