Erasmus+ cu oportunidad pa educacion secundario
Oficina di Relacionnan di Union Europeo y di Reino (BEUK) ta informa cu e programa Europeo di subsidio Erasmus+ ta brinda oportunidad di mobilidad y cooperacion den educacion secundario general.
E programa Europeo di subsidio Erasmus+ ta ofrece diferente oportunidad na studiante y profesional riba diferente nivel di educacion, por medio di subsidio, crea contacto cu institucionnan di educacion na Europa, pa intercambia conocemento y ideanan y pa formula maneho nobo.
E opcion di subsidio pa educacion secundario profesional (enseñansa profesional basico y enseñansa profesional intermedio) ta wordo dividi den dos linea di accion clave: accion clave 1 (mobilidad) y accion clave 2 (partner strategico).
E prome accion (KA1), proyectonan di intercambio y mobilidad, ta ofrece profesionalnan den educacion y studiantenan oportunidad pa adkiri conocemento y habilidadnan nobo den exterior.
E di dos accion (KA2), cooperacion, tin como obhetivo pa fortalese educacion secundario profesional a traves di colaboracionnan chikito y na escala mas grandi entre institucion y organisacion den paisnan Europeo (cu exepcion di Hulanda).
Plan di accion 2021-2027
E plan di accion presenta pa 2021-2027 ta pone enfasis riba e temanan di inclucion, orientacion pa futuro, digital y duradero.
E programa ta dirigi na e siguiente gruponan:
- Studiantenan (cu ta inscribi na un scol profesional secundario of cu a gradua na un scol profesional secundario den e ultimo 12 lunanan);
- Personal di e scolnan aki;
- Docentenan y formadornan na e scolnan aki;
- E scolnan mes;
- Organisacionnan di e scolnan.
Sinembargo, solamente un entidad huridico por haci un solicitud pa fondo bou di Erasmus+.
Guia di programa
Union Europeo a publica un Guia di programa Erasmus+, cu ta duna splicacion y informacion esencial di e programa y un lista di oportunidadnan cu ta wordo cubri pa e programa.
Ta importante pa verifica stapnan pa yega na un peticion di subsidio, prome cu entrega esaki:
- Participa na reunionnan informativo over di Erasmus+;
- Consulta e condicionnan y deadlines riba e website di Erasmus+;
- Cuminsa na tempo cu preparacion di bo peticion;
- Dirigi e peticion na e impacto di bo proyecto y implementacion di obhetivonan di Union Europeo;
- Busca socionan adecua;
- Uza documentonan corecto pa prepara un peticion corecto cu ta cumpli cu tur rekisito, disbonibel ariba e website di Erasmus+;
- Consulta e instruccionnan tecnico pa peticion di proyecto;
- Entrega bo peticion na tempo;
- Informa bo mes riba e aprobacion di bo peticion y e stapnan cu mester tuma pa e implementacion di bo proyecto;
- Informa bo mes di e rechaso di bo peticion, siña di dje, y exito cu e siguiente peticion.
Interes?
Na cualkier momento bo por comparti bo peticion cu Oficina di Relacionnan di Union Europeo y di Reino pa verifica si bo peticion ta cumpli cu e obhetivonan y maneho di Union Europeo. E peticion ta wordo entrega oficialmente na e Agencia Nacional a traves di e website y formulario Erasmus+. E formulario di peticion pa 2022 y otro documentonan relaciona ta wordo prepara actualmente y pronto nan lo ta disponibel riba e website di e Agencias Nacional of di e Agencia Ejecutiva Europea di Educacion y Cultura.
Bo ta interesa? E proximo sesion di informacion ta tuma luga diahuebs dia 18 di november 2021 pa 9or di mainta.
Pa esaki mester registra via erasmusplus.nl.
Pa cualkier pregunta tocante e programa por comunica cu BEUK via telefon 5834705 of email info@arubagovernment.eu.
Info / Contact
Pa mas informacion por busca den e alfabet menu riba nos pagina principal:
Pa pregunta por tuma contacto cu:
Scroll To Top
