Disciplina Consciente®

Conscious Discipline ®

Den e ultimo añanan e sociedad a bira mas complica y asina tambe e desaroyo social emocional y e retonan riba tereno di comportacion di nos alumnonan ta pidi atencion specifico di nos scolnan. E programa di Disciplina Consciente / Conscious Discipline ® (CD)ta duna tools cu por contribui na un miho educacion social emocional di nos muchanan.

Conscious Discipline ®, desaroya pa Dr. Becky Bailey, den contexto di scol ta un sistema di educa mucha den cual ta integra maneho di klas cu e desaroyo social emocional di e alumno, trahando tanto na e inteligencia emocional di e mucha como di e maestro. Saliendo for di e punto di bista cu pa un adulto por guia un mucha riba tereno social emocional, e mes mester conoce su mes y traha riba su regulacion propio. E maestro ta bira habil pa responde riba conflicto diario na un manera consciente, transformando asina e conflicto den un oportunidad pa e mucha desaroya habilidad social-emocional importante pa bida. CD ta inclui den su asercamento tambe informacion tocante con trauma ta ser ocasiona y con pa recupera di esaki.

Conscious Discipline ® ta “evidence-based” y a wordo nombra pa Florida State Legislature como modelo nacional pa educacion di caracter.

Na Juni 2020 CD a ser reconoci door di Collaborative for Academic, Social, and Emotional Learning – CASEL, un organisacion cu ta revisa programanan social emocional cu ta evidence-based. CASEL a incoropora CD den nan ‘SELect Program designation’ cu ta un guia di e programanan evidence-based di calidad mas halto, bisando cu CD ta hunga un rol crucial den e asercamento di un scol pa promove e siñamento social-emocional.

Desde 2011 te cu awor cu sosten di e diferente Ministernan di Enseñansa y DEA, den colaboracion den pasado cu Develop to Grow y ultimamente Fundacion Educador Consciente Aruba, a organisa varios training di CD na unda maestronan a haya oportunidad pa adkeri conocemento y hermentnan di CD.

Programa

Disciplina Consciente® ta basa riba:

1. Estadonan di cerebro

E modelo di estado di cerebro ta e cuadro di referencia pa nos compronde e estado interno di e cerebro cu ta produci cierto comportacion den mucha y tambe adulto. Si nos ta consciente di e tres estadonan di cerebro cu ta estado di sobrevivencia, estado emocional y estado ehecutivo, nos por maneha nos pensamento y emocion na un manera cu nos por yuda e mucha pa siña maneha di dje.

Ora nos ta sinti insigur nos cerebro ta bay den estado di sobrevivencia. Pa sali for di e estado aki, nos mester crea sentimento di siguridad.

Si un hende ta sinti cu cos no ta bay manera nan ta desea, e cerebro ta bay den estado emocional. Pa por sali for di e estado emocional, e persona mester sinti su mes conecta bek cu e hendenan den su ambiente directo.

Ora e cerebro ta den e estado ehecutivo, un persona ta den e situacion den cual e por resolve problema, haci cambio y haci escogencianan sabi. Pa e cerebro ta den e estado aki nos por haci uzo di diferente tecnica pa saca nos mes for di e estado di sobrevivencia y di e estado emocional.

2. E shete podernan di Disciplina Consciente®

3. E concepto famia di scol™

4. E shete habilidadnan di disciplina

For di e shete (7) podernan ta sali tambe e shete (7) habilidadnan:

Wanta nos compostura den situacionnan dificil
Encurasha nos mes y otro
Ta asertivo ora cos no bay na un manera aceptabel pa nos
Sa scoge
Sinti empatia
Wak e intento positivo
Anda cu consecuencia di nos comportacion

E shete habilidadnan ta siña nos pa responde riba conflicto den un forma cu ta yuda e mucha move di e estado mas abou di su cerebro pa e estado mas cooperativo cu ta e estado ehecutivo di e cerebro.

Implementando e shete podernan y e shete habilidadnan nos ta siña keda den control di nos mes y educando e muchanan na un manera cu nos ta un ehempel di loke nos kier pa nan siña.

Cu Conscious Discipline ®, un cambio den educacion y maneho di klas ta tuma luga. Disciplina a base di forsamento, miedo y premiacion ta keda atras. Den su luga ta bin disciplina cu enfoke riba motivacion cu ta nace di paden, contribucion, resolvimento di problema y conexion.

E programa di Conscious Discipline ® ta originalmente desaroya den contexto di klas, pero ta aplicabel den tur interaccion di e ser humano. Tin workshops y material desaroya tambe pa e mayor por haci uzo di dje na cas.