Dia publico na IPA
Diasabra dia 16 di januari proximo Instituto Pedagogico Arubano (IPA) ta tene su Dia Publico (Open dag) anual. E instituto ta ofrece estudio pa formacion di maestro di scol preparatorio, di scol basico y di scol avansa.
Maestro di Curason
IPA tin 25 aña formando maestro pa enseñansa di Aruba y den transcurso di aña e instituto aki a demostra y afirma e necesidad y balor cu e tin. IPA kier pone enfatisis riba e hecho cu como maestro fuera di ta educador bo ta un “role model” pa bo alumnonan. Un maestro tin un impacto enorme riba un mucha y como bon maestro bo por haci e diferencia y yuda e mucha saca lo maximo di su potencialnan. Pa haci esaki posibel bo mester ta un maestro cu ta educa, guia, motiva y inspira. Cu otro palabra, bo mester ta un maestro di curason.
Dia Publico
 |
Durante e Dia Publico lo duna informacion general di e estudio di maestro, presentacion di proyecto di studiante y exposicion di e diferente areanan di formacion di e estudio di maestro pa haya un miho bista riba kico e estudio ta encera. |
Esakinan ta entre otro Studenten Services, Biblioteca IPA, Sector Naturalesa y Tecnologia, Sector Pedagogia, Bureau Praktijk, Sector Hende y Comunidad, Centro di Investigacion y Desaroyo pa Enseñansa, Sector Idioma y Comunicacion, Sector Matematica y Sector Arte.
Banda di esaki tur persona cu ta interesa den e estudio Hulandes di di dos grado y Papiamento Bachelor por pasa IPA pa ricibi informacion y yena un formulario di interes.
Oportunidad pa inscribi
Lo tin oportunidad pa inscribi como studiante pa e estudio pa maestro di enseñansa primario. Pa por inscribi na IPA mester trece e papel di registro civil (papel di AWG 5,-), si a gradua caba copia di diploma di sea HAVO, VWO, MBO nivel 4 of IBERO. E gastonan di inscripcion ta AWG 75,-. Pa mas informacion por tuma contacto cu Studenten Services na 524-3100 of bishita IPA su facebook page:
SIPA cu Food and Bake Sale
 |
E Conseho di Studiante di IPA (SIPA) lo tin un Food & Bake Sale. E benta di cuminda aki tin como meta pa recauda fondo pa diferente actividad y proyecto cu SIPA a plania pa aña academico 2015-2016. |
SIPA ta traha na beneficio di e studiantenan di IPA y ta bin cu proyecto pa cambio y mehoracion di entre otro facilidadnan pa e studiantenan di e instituto. Banda di esaki SIPA ta asisti na diferente seminario, tayer y congreso ambos local y internacional.
IPA ta invita studiantenan di HAVO, VWO, EPI, IBERO y tur otro persona interesa pa cuminsa un estudio pa maestro pa asisti na su Dia Publico p’asina cera conoci cu e instituto en general y e ambiente estudiantil en particular, conoce su facilidadnan y tambe pa haya informacion di loke IPA ta haci. E Dia Publico lo ta dia 16 di januari 2016 for di 10or di mainta te 2or di atardi.
E prome aña na IPA
E prome aña di estudio pa maestro di enseñansa primario na IPA ta e aña cu bo ta orienta riba bo futuro profesion como maestro. Durante e periodo aki bo ta cera conoci cu tur area di formacion y tambe e dos specialisacionnan cu IPA ta ofrece. Na final di e prome aña bo por scoge pa e specialisacion mucha di 4 pa 8 aña of di 6 pa 12 aña.
Studiante na palabra
Otami Thomasia, studiante di aña cuater, ta conta su motivacion pa scoge pa e specialisacion 4 pa 8 aña.
 |
“Na aña 2012 mi a cuminsa cu e estudio pa bira maestro di scol primario na IPA. Pa bisa berdad mi no tabatin niun idea di locual tabata sperami. Ma cuminsa e aña cu un pensamento positivo y mi a haci todo por todo pa duna tur locual mi por. Ora e momento a yega pa bay haci mi practica den un kleuter klas mi tabata nervioso. Mi tabatin hasta miedo di para dilanti di klas. Despues di un paar di dia cu e muchanan mi a enamora. E smile riba nan cara ora nan logra algo, e brasa cu nan ta dunabo ora nan yega scol y tur e momentonan cu bo ta pasa cu nan den klas ta tremendo. Sa tin momento menos , pero como maestra bo ta siña deal cu nan y compronde cada mucha individual. Despues di mi ultimo dia di practica mi a dicidi na caminda pa cas cu ta e profesion di maestro ta lo cual mi kier eherce pa resto di mi bida.
Na final di aña academico 2012-2013 mi a dicidi sin duda cu mi kier traha cu mucha di 4 pa 8 aña y te awe mi ta para 100% tras di mi desicion. Mi stima locual mi ta haciendo y mi no por warda pa por tin mi klas p’asina mi haci un diferencia. Como mama di un yui di cinco aña bayendo scol no ta facil, pero danki na mi famia cu ta duna mi sosten mi a logra di haal mi propedeuse den mi prome aña y den menos cu un aña lo mi tin mi diploma den mi man.”
Pasantia Internacional
Un parti esencial di e programa di IPA ta e pasantia internacional (buitenlandse stage) cu e studiantenan mester cumpli cu ne den cuadro di e curiculo di e estudio. Meta principal di e pasantia ta pa e studiantenan conoce cultura y sistema di enseñansa diverso, desaroyo profesional y personal y pa trece innovacion specificamente riba tereno di Desaroyo Sostenibel den ensenañsa na Aruba. Thiara Wever, graduado di 2015, ta conta con el a experiencia su pasantia internacional na Costa Rica.
 |
“Como preparacion pa e pasantia internacional nos a participa dos siman largo na diferente tayer. E programa a enfoca riba e 4 P’s di sostenibilidad, segun Nacionnan Uni cual ta Planet, People, Profit y Participatory Governance. Nos, como e grupo cu a bay Costa Rica, a haya e encargo di IPA pa investiga e desaroyo sostenibel di turismo y e structura di enseñansa di e pais. Nos a haya e oportunidad pa bishita Universidad de Costa Rica (UCR), unda nos a participa na un programa pa conoce e diferente scolnan. Di e manera aki nos por a haci un comparacion entre e sistema di educacion di Aruba y esun di Costa Rica. Tambe nos a haya oportunidad pa duna un presentacion di Aruba na e studiantenan di UCR cu ta studiando pa bira maestro.
Nos a participa na diferente excursion y actividad cultural p’asina nos conoce un poco mas di e cultura di Costa Rica. Nos a explora e naturalesa di Costa Rica cual ta sumamente atractivo. Nos a bishita volcan Poaz y volcan Arenal. Tambe nos a bay e parke La paz waterfalls unda nos a experiencia diferente waterval. Ziplinning no por a keda afo. Costa Rica su biodiversidad di flora y fauna ta hopi grandi, y esaki ta loke a impactami hopi. E periodo di pasantia internacional sigur tawata un experiencia unico y bunita. E no ta un temporada facil, ya como cu bo lo no ta cerca di bo famia pa un periodo di un luna. Pero e ta un periodo di bo bida unda cu sigur bo ta haya tempo pa refleha riba bo mes, conoce bo mes mas miho, conoce y comparti cu otro persona . E ta un experiencia unico y inolvidabel.”
 |
Fase final di estudio
Durante e fase final di estudio na IPA tur studiante mester haci entre otro un investigacion riba tereno di educacion y un proyecto social pa comunidad pa por completa nan estudio cu exito. Juffrouw Tahirah van Cleef ta docente na Arco Iris Kleuterschool y ta un graduado di IPA di aña 2008.
 |
“Mi a ehecuta mi proyectonan di finalisacion di estudio tocante autismo, caminda mi a conecta e proyecto social y e proyecto di investigacion na otro. E motivacion pa scoge e topico tawata cu mi a topa un mucha cu autismo den un stage. El a yama mi atencion y a haci mi hopi caweta pa sa mas kico e esaki ta encera realmente. Mi a ehecuta mi proyecto social pa Fundacion Autismo Aruba (FAA). Un meta cu e fundacion tin ta pa conscientisa hende kico autismo ta y con mester atende esaki. |
Autismo tabata algo basta nobo pa nos comunidad. Ami y un colega studiante a colabora na esaki door di entre otro organisa un caminata. Door di e mesun caweta aki pa sa mas di autismo, mi a dicidi di haci mi investigacion tambe riba e tereno aki. Hunto cu un colega studiante mi a haci un investigacion titula: “Autisme binnen het regulier kleuteronderwijs” y tambe nos a desaroya un buki di informacion pa docente con pa guia e alumnonan cu autismo. Mi a haya bon conocemento di autismo y hasta mi a sigui algun curso di autismo. Te awo mi por bisa cu mi sa kico e ta encera y mi sa tambe con pa yuda un mucha cu e limitacion aki si mi haya un alumno asina den mi klas.
E lesnan na IPA cu sigur a yuda mi cu mi proyectonan di finalisacion di estudio y tambe awor como docente ta e lesnan di pedagogiek y orthopedagogiek. Dicon? Pasobra eseynan a duna mi conocemento di e mucha mes. Esaki a duna mi hopi beneficio, paso mi sa con e mucha ta pensa, mi conoce su desaroyo y mi sa con pa trata e mucha. Si bo sa esaki bo por logra hopi mas cu bo alumnonan.” Jufrouw Tahirah ta conclui.
Graduado na palabra
Desde IPA su inicio te awor, e instituto a conoce varios graduado cu a termina e estudio cu exito y cu awor orguyosamente ta maestro competente y ehemplar den nos comunidad.
Juffrouw Jade Padron Faneites ta docente na Colegio Conrado Coronel y ta un graduado di IPA di aña 2009. Juffrouw Jade mes ta duna splicacion di su motivacion pa bira maestro, di e estudio na IPA y tambe di e bunita profesion cu awor e ta eherce.
 |
“Personalmente mi ta kere cu e profesion di maestro ta un vocacion. For di un edad hopi jong mi tabata sa cu mi vocacion den bida lo tin di haber cu enseñansa. Na IPA mi a siña hopi cos y entre nan e habilidad pa anticipa situacion y busca solucion creativo pa cualke situacion.
Actualmente un maestro di scol na Aruba no tin un tarea facil. Nos tur sa cu e muchanan di awendia ta e muchanan di e era nobo. Esaki ta nifica pa un maestro cu e mester ta, no un, pero dies stap dilanti di e conocemento di su alumno. E maestro mester ta al tanto di locual ta pasando na mundo, esta di e tecnologia. Na e mesun momento ta rekeri pa e ta un persona hopi humano. Cu esaki mi ta referi na e parti emocional di e muchanan. Nos trabou awendia no ta simpelmente para dilanti di klas y duna les, pero e ta encera hopi mas. Nos ta e persona cu ken e mucha ta comparti gran parti di su dia y nos tin cu brinda e mucha un bon educacion y tambe atencion, cariño y cuido.
Scoge pa e profesion aki di curason! No pone na prome luga e beneficionan cu e profesion aki ta duna bo, sino e satisfaccion cu e profesion aki lo duna bo na momento cu bo eherce esaki cu curason. Corda “to teach is to touch a live forever”.
Ser masculino den Enseñansa
Un di e graduadonan di e estudio Movecion y Salud ta docente Bryan Lopes. Meneer Bryan a gradua na IPA na aña 2011 y ta docente na Paulus School. Meneer Bryan mes ta duna splicacion di e importancia y di ta maestro masculino den enseñansa na Aruba. Alabes e ta curasha tur interesado, specialmente studiante masculino di HAVO, VWO, EPI, IBERO pa scoge e profesion di maestro:
 |
“Esaki ta mi di cuater aña den enseñansa cu mi por bisa cu mi ta wak e beneficionan como ser masculino; specialmente cu e muchanan. Cu esaki mi kier bisa cu awendia tin hopi mucha cu ta pasa den situacion dificil den cua e mayornan ta separa for di otro. Mayoria di mucha ta keda atras cu e mama so, na unda ta keda sinti falta di e ser masculino den nan bida. |
Aki ta e ser masculino ta hunga un rol hopi importante mes den enseñansa. Contando mi experencia mi por bisacu cada dia cu mi drenta cura di scol e muchanan ta ricibi mi cu hopi amor. Pakico? Paso ademas di ta un maestro di “Movecion y Salud” (Bewegings Onderwijs y gezondheidseducatie), mi ta mane un “tata”, un “big brother” y tambe un persona cu ta purba scucha y yuda tur tur mucha.
Abo mes como ser masculino ta sigui crece y bira un miho persona y un miho docente. Alabes como ser masculino, bo ta duna e team di scol un empuhe enorme na unda, cu por ehempel, nan por conta cu bo ne momento dificil, momento di yuda bin cu solucion pa mucha cu problema di conducta. Abo, e ser masculino, ta trece un trankilidad enorme den enseñansa. Asina ta, no tene miedo, tuma e stap bunita aki, paso e profesion di maestro ta e trabou di mas bunita y dushi cu tin riba mundo.”
Info / Contact
Pa mas informacion por busca den e alfabet menu riba homepage: [I] Instituto Pedagogico Arubano (IPA) of por tuma contacto cu IPA
Scroll To Top
