Dia di Educacion y Enseñansa
Na aña 1996 Gobierno di Aruba, basa riba un peticion di Sindicato di Maestro SIMAR, a proclama dia 1 di juli como Dia di Educacion y Enseñansa.
E fecha 1 di juli tin un nificacion special pa e sindicato como cu ta riba dia 1 di juli 1969 a funda e organisacion aki. Departamento di Enseñansa Aruba ta felicita directiva y miembronan di SIMAR riba e fecha importante aki.
 |
Departamento di Enseñansa ta haci uzo di e oportunidad aki tambe pa felicita y gradici un y tur cu ta traha pa Enseñansa na Aruba. Enseñansa ta fundeshi di un comunidad y mester ocupa un funcion cardinal den desaroyo di un pais.
Na Aruba mas di binti mil alumno ta bay scol tur dia. Na mas o menos ochenta scol, e hoben y muchanan ta haya e oportunidad pa descubri y desaroya nan propio capacidad. Alrededor di 1500 Maestro di Scol ta dedica nan mes na enseñansa y educacion di nos yiunan.
Dia di Educacion y Enseñansa ta un bon momento pa nos reflexiona riba su balor y importancia, pero tambe riba e retonan y e responsabilidad cu cada un di nos tin den enseñansa y educacion di nos yiunan, di nos comunidad.
Departamento di Enseñansa alabes ta felicita tur nos muchanan cu a bay over y e hobennan cu a gradua, y ta desea hopi animo y exito na esnan cu tin cu pasa e aña un biaha mas.
Info / Contact
> Departamento di Enseñansa Aruba
Scroll To Top
