Despues di 13 aña a ahusta e normbedrag
Recientemente durante un Conferencia di Prensa di Gobierno di Aruba a trata e topico di “normbedrag”. E “normbedrag” ta ancra den ley y ta e compensacion cu directivanan di scol ta ricibi a traves di “exploitatiesubsidie”.
E “normbedrag” ta cubri costo di, entre otro, mantencion y seguro di e edificio di scol y lokaal, limpiesa di edificio y lokaal, coriente, awa y gas, mantencion di mueble di e scolnan, inversion den material di desaroyo “hulpmiddel” y necesidadnan di scol, “lesmateriaal” y admistracion.
E directivanan di scol ta ricibi un suma cu hopi biaha ta miyones di florin, depende di e grandura di e scol pa cubri tur gasto cu a ser menciona.
E ley ta bisa cu cada tres (3) aña mester calcula si mester aumenta e suma aki. E ultimo rapport oficial ta di aña 2009 y e ultimo aumento a tuma luga na aña 2010. Enseñansa tabata coriendo diestres (13) aña atrasa encuanto e ahustenan necesario pa e “normbedrag” por ta actualisa.
Durante aña 2023 un team di experto cu ta compronde e materia a haci un investigacion y calculacion. Na final di e investigacion un rapport a keda presenta, unda cu a indica cu mester “haal in” e suma di 6.4 miyon florin. Dia 4 di september 2023 den tratamento di e “voorjaarsnota”, Parlamento di Aruba a aproba 50%, esta 3.2 miyon florin.
Den luna di december di aña 2023, ora cu Parlamento di Aruba a trata Presupuesto di Pais Aruba a aproba e otro 50%, esta 3.2 miyon florin. Pues, un total di 6.4 miyon florin a haal in te cu aña 2023. Esaki ta significa cu a inverti hopi mas placa den enseñansa pa asina e directivanan di scol por cubri nan gastonan.
Pa conclui, entre e proyecto di construccion di Juliana School, construccion di fase 2 di Mon Plaisir Havo y “normbedrag”, enseñansa di Aruba a ricibi 16 miyon florin adicional.
