DEA a digitalisa Material Educativo
Na 2019 Departamento di Enseñansa Aruba (DEA) a inicia un proyecto di digitalisacion di Material Educativo cu ta destina pa tur directiva di scol, scol y demas actor den enseñansa.
Meta di e proyecto ta pa facilita acceso di material educativo na e scolnan di Aruba como tambe pa stimula uzo di medio digital den scol. Pa por logra esaki a amplia e website ea.aw cu un portal nobo special pa material educativo.
E portal ta contene pa un gran parti edicionnan di Seccion Desaroyo di Curiculo pero tambe material di referencia desaroya pa Proyecto Idioma den Enseñansa.
Ta trata di e.o. buki di alumno y manual pa docente di e diferente metodonan cu a desaroya pa tur tipo di scol como tambe tur e materialnan di sosten cu ta pertenece na e metodonan, manera buki di lesa, poster, wega, flipcards, material audiovisual (video y cantica), etc.
Acceso na e portal ta exclusivamente pa e sector di enseñansa, caminda cada scol y directiva a haya nan propio cuenta di usuario pa por log in.
Seccion Desaroyo di Curiculo
Seccion Desaroyo di Curiculo (DEA) ta encarga cu desaroyo y revision di programa di enseñansa y material educativo pa enseñansa na Aruba. A lanta e seccion na aña 1986 cu e meta pa percura pa material cu ta tene cuenta cu e mucha cu ta biba na Aruba. Cu tempo e seccion a crece y (t)a percura tambe pa e metanan nucleo pa enseñansa primario y pa e terminonan final pa enseñansa avansa y profesional den luz di innovacion den enseñansa.
E seccion a desaroya programa y material educativo pa enseñansa basico (Scol Arubano Multilingual), Enseñansa Profesional Intermedio (EPB) y enseñansa secundario general (mavo, havo y vwo).
Proyecto Idioma den Enseñansa
Proyecto Idioma den Enseñansa (DEA) ta traha riba standarisacion (fihamento di regla) y cultivacion di Papiamento pa sostene introduccion di Papiamento den enseñansa. Den e cuadro aki (t)a publica material di referencia pa ortografia (buki y spelling checker) y gramatica.
Proyecto Idioma den Enseñansa tambe (t)a guia hopi proyecto di redaccion, produccion y publicacion di buki di lesa (ficcion y no-ficcion) na Papiamento. Gran parti di e publicacionnan aki tambe ta wordo haci accecibel a traves di e portal.
Intencion ta pa tur publicacion di awor en adelante ta digitalisa y accesibel riba e website, cu lo ta uno dinamico cu espacio pa mehoracion continuo.
Departamento di Enseñansa Aruba a desaroya e portal pa material educativo den cooperacion estrecho cu sr. Dwayne Heronimo di e compania Orbitalnets.
Cu lansamento oficial di e portal ea.aw/materialeducativo ta spera di por duna sosten na e usuarionan, esta tur directiva di scol, scol y demas actor den enseñansa den nan trabou pa progreso di enseñansa na Aruba:
Info / Contact
Pa mas informacion por busca [M] Material educativo den e alfabet menu riba nos pagina principal of por tuma contacto cu DEA seccion Desaroyo di Curiculo
Scroll To Top
