Curso Finansas den mi Hogar
Registracion ta habri pa curso ‘Finansas den mi Hogar’ den districto di Noord. Un proyecto cu ya caba a haya un bon acohida den districtonan Paradera, Savaneta, Oranjestad y San Nicolas.
E curso ta start dia 4 di september 2023 y tin un duracion di 4 siman. Na final di e curso cada cursista lo ricibi un certificado di participacion.
E curso ta consisti di 4 sesion cu ta enfoka riba con pa maneha nos finansa cada dia. E 4 sesionan ta:
- Sesion 1: Mi ta efectivo den mi cas. Con mi por spaar y tambe con pa cumpra sin emocion.
- Sesion 2: Mi ta paga mi debe. Kico lo pasa ora mi no por paga mi debe mas.
- Sesion 3: Mi ta inverti den mi futuro. Futuro di nos y nos yuinan ta importante y con nos por logra nos metanan.
- Sesion 4: Mi presupuesto. Kico ta luho y prioridad y con segun bo entrada bo por presupuesta y asina logra nos metanan.
Na Aruba 3 di 10 hogar ta gasta mas di nan entrada tur luna segun sondeo di Banco Central di Aruba. E desaroyo aki ta uno preocupante pasobra e ta indica cu cada luna ta un reto pa hogarnan cumpli cu tur necesidad y responsabilidadnan financiero manera entre otro gasto pa vivienda, cuminda, y prestamonan personal. Como consumidor ta importante pa sa ki impacto cada decision financiero tin riba nos cartera y nos hogar. Cu e curso aki, nos ciudadanonan ta ricibi guia y conocemento cu por yuda tuma decisionan financiero cu ta beneficia su bienestar, den tur districto di Aruba y awor den districto di Noord.
E Proyecto Finansas den mi Hogar a wordo desaroya door di Fundacion Plan di Bida. Fundacion Plan di Bida cu su presidente sra. Paloma Osorio- Tromp tin como mision y vision trece conscientisacion den nos comunidad, ofreciendo ayudo y guia mustrando e manera pa maneha nos finansa mas efectivo. Hunto cu Fundacion Plan di Bida lo ofrece un curso como apoyo na nos hendenan.
Minister Geoffrey Wever ta invita bo pa registra y participa pa asina haya e apoyo necesario pa un bon maneho di bo finansas. Registacion ta completamente gratis, pero cupo ta limita.
Pa mas informacion y registracion por tuma contacto cu Fundacion Plan di Bida via telefon 5688848 of email finansasdenmihogar@gmail.com.
Fuente
Info / Contact
- Fundacion Plan di Bida
