“Connection is Cooperation”
Dianan 23 y 24 di april 2013 a tuma luga pa di cuater biaha e workshop “Connection is Cooperation” di Disciplina Consciente na Aruba. Jill Molli di Loving Guidance na un manera dinamico a duna e workshop aki na 200 maestro di scol primario.
E parti organisatorio tabata den man di Develop to Grow y tabata financia pa Ministerio di Educacion y Husticia. Esaki tabata di 4 biaha cu e workshop aki a wordo duna na Aruba y en total mas cu 850 hende di cual gran mayoria di maestronan di kleuterschool y scol basico a asisti na e workshop aki.
Disciplina Consciente
Riba e prome dia Jill a duna splicacion amplio di e base di Disciplina Consciente. Den e palabranan di dr. Becky Bailey, e desaroyado di Disciplina Consciente: “Disciplina no ta algo cu bo ta haci cu mucha, pero e ta algo cu bo ta desaroya den mucha.”
Aki a splica primordialmente con e cerebro ta funciona y e importancia di e desaroyo social emocional pa e ser humano. Esaki a sosode a base di splicacion, diferente ehercicio di reflexion y movecion.
Durante e dia Jill mes a modela diferente di e habilidadnan cu Disciplina Consciente ta presenta. E maestro a haya oportunidad pa pensa riba su propio emocionnan; con e ta anda awor cu su propio emocionnan y con e por anda cu nan den futuro na un manera mas satisfactorio.
Disciplina Consciente den klas
Riba e di dos dia a presenta e diferente structuranan di Disciplina Consciente cu ta sostene e maestro den su maneho di klas trahando cu su muchanan na e 7 habilidadnan di Disciplina Consciente. E mensahe cardinal ta pa haci uzo di conflicto diario pa educa e alumnonan den e 7 habilidadnan social emocional.
Riba cada dia un cabesante y un maestro di un scol cu a cuminsa introduci Disciplina Consciente a comparti nan experencia cu e participantenan. E punto comun di tur dos scol ta cu e ta un proceso cu mester haya espacio y atencion specifico, pero cu poniendo e prome stapnan caba bo por mira un diferencia tanto den comportacion di e muchanan como cerca e maestronan.
Importancia di sosten
Na final di e di dos dianan, Jill a trece dilanti e importancia di sosten pa e teamnan cu kier bay traha structuralmente na introduccion di Disciplina Consciente den nan scol. Rol di cabesante, maestro y guia a bini den spotlight.
Pa scolnan cu ta desea follow up riba e dos dianan aki di workshop lo tin den proximo aña escolar netwerk di Disciplina Consciente organisa of sosteni pa Seccion Guia di Departamento di Enseñansa Aruba (DEA). Tambe scol cu ta desea por contact Seccion Guia di DEA of Develop to Grow pa un workshop cu por sostene nan den introduccion di Disciplina Consciente na nan scol.
Info / Contact
Pa mas informacion por busca [D] Disciplina Consciente of [C] Conscious Discipline den e alfabet menu riba nos homepage of tuma contacto cu:
Scroll To Top
