Conferencia di prensa: Solucion pa Landamento Escolar y EPB
Durante e conferencia di prensa di Gobierno di Aruba dia 11 di october 2021, e minister encarga cu enseñansa (Croes) a elabora riba e solucionnan pa Landamento Escolar y EPB.
Landamento Escolar ta sigui
Minister Croes a anuncia cu entrante 14 di october, les di landamento por start bek na scolnan basico. Esaki ta posibel awor cu a soluciona e reto cu contract di instructornan di landamento y tambe como cu a aloca fondo necesario pa paga transporte pa e muchanan cu ta haya e les.
Tabata siman pasa cu Minister Croes a informa cu a yega na un solucion pa e problema di pago pa ‘zweminstructeurs’. A base di conseho cu a pidi y ricibi di Departamento di Recurso Humano (DRH) a tuma e decision cu lo aloca e instructornan bek bou di Dienst Publieke Scholen (DPS), bou di e contract cu nan tabatin anteriormente y cu nan a traha cu ne/conoce pa 28 aña.
Banda di esaki tabatin un reto mas cual tabata falta di fondo pa transporte di e muchanan cu mester haya les di landamento. Minister Croes a informa cu a percura pa aloca e fondo necesario pa e transporte aki por tuma luga. Ta trata aki di un suma di 300 mil florin for di su propio presupuesto.
EPB
Durante e conferencia di prensa Minister Croes a informa cu a logra yega na un solucion pa loke ta e 33 hoben cu no por a cuminsa scol na EPB. E minister a informa cu a percura pa pone e fondonan necesario disponibel pa maestronan por surpasa e porcentahe di oranan extra. Asina ta permiti EPB pa por habri 2 klas mas pa e hobennan por cuminsa scol.
Anteriormente e minister a informa cu na EPB tabatin un grupo di hoben cu no por a cuminsa scol na luna di september. 21 di e hobennan aki ta cay bou di EPB Oranjestad y 12 ta cay bou di EPB San Nicolas (total 33). E motibo di esaki ta door cu tin un norma pa locual ta trata oranan extra (over uren) cu ta encera cu maestronan no por surpasa 4% na ora extra.
Despues di un conseho positivo di Dienst Inspectie van het Onderwijs y tambe despues di a reuni cu EPB, Minister Croes a tuma e decision pa pone e fondonan necesario disponibel pa por surpasa e oranan extra cu ta stipula na 4%. Asina ta permiti EPB pa por habri e 2 klasnan necesario pa e 33 hobennan por cuminsa scol. EPB lo tuma contacto cu tur e almunonan y/of nan mayornan y stipula e fecha cu e 2 klasnan lo habri pa e alumnonan por bay scol.
Minister Croes a conclui gradiciendo tur e departamentonan cu a yuda yega na un resultado corecto.
Conferencia di Prensa
Por wak e conferencia di prensa completo aki:
Info / Contact
Pa mas informacion por busca den e alfabet menu riba e pagina principal:
Pa informacion di contacto:
Scroll To Top
