Coastal Carolina University cu anochi di Informacion
Diamars dia 2 di mei proximo Ministerio di Enseñansa conhuntamente cu representantenan di Coastal Carolina University (South Carolina, USA) lo tene un anochi di informacion pa tur studiante cu tin e interes pa studia na e Universidad aki cu ta ofrece in-state tuition pa studiantenan di Aruba.
 |
Durante di e anochi di informacion lo duna informacion general riba studia na Coastal Carolina University (CCU) y lo enfoca riba e diferente programanan di estudio cu e universidad tin pa ofrece y tambe lo duna informacion riba e in-state tuition special cu tin pa studiantenan di Aruba.
E anochi aki lo conta cu presencia di sra. Darla Domke-Damonte, kende ta Associate Provost Global Initiatives di e Universidad y tambe sra. Amy Williams, Associate Director International Recruitment & Admissions. Ambos representante lo por contesta tur pregunta riba e parti di admission, programanan di estudio y tambe facilidadnan cu Coastal Carolina University ta ofrece. |
Manera a wordo anuncia durante e ultimo añanan Minister di Enseñansa Michelle Hooyboer-Winklaar, na nomber di Gobierno di Aruba, a logra formalisa diferente acuerdo na Merca y Canada cu ta garantisa areglonan special na beneficio di nos studiantenan di Aruba.
Den e caso di Coastal Carolina University esaki ta e di dos Universidad na e estado di South Carolina, banda di University of South Carolina (USC), cu a reconoce formalmente e “State-to-State agreement“ cu a keda formalisa entre Aruba y e estado di South Carolina. Door di esaki Coastal Carolina University ta ofrece e “in-state tuition fee“ na tur studiante di Aruba cu ta encera un rebaho substancial ariba gastonan di estudio compara cu e tarifa pa studiantenan internacional.
 |
Coastal Carolina University ta un Universidad bon reconoci na Merca y ta e di tres Universidad mas grandi di e estado di South Carolina.
E areglo particular aki cu e estado di South Carolina y Coastal Carolina University ta un beneficio hopi grandi pa nos studiantenan y ta haci studia na Merca un opcion mas accesibel y atractivo pa studiantenan di Aruba.
Tur interesado y particularmente tur studiante cu ta interesa pa bai studia na Coastal Carolina University ta keda cordialmente invita pa e anochi di informacion cu lo tuma luga diamars dia 2 di mei proximo cuminsando pa 7 or di anochi na e Collegezaal di Colegio EPI (edificio cora kima na entrada principal).
Durante di e anochi di informacion lo duna tur e informacion relevante cu studiantenan tin mester pa por bai studia na CCU y tambe lo tin espacio pa haci pregunta.
Acuerdo
E acuerdonan ta obtenibel riba nos website EA.AW: [Studia na Merca > Institutions]
Website
 |
Website: [Coastal Carolina University]
Info / Contact
Pa mas informacion por busca den e alfabet menu riba homepage: [S] Studia na Merca of por tuma contacto cu DEA > afdeling Studiefaciliteiten.
Scroll To Top
