Certificacion di diploma
Bo a gradua y mester laga certifica (waarmerk) bo diploma y/of cijferlijst? Studiantenan cu a aplica pa Arubalening mester entrega un copia certifica den e portal. Aki por haya mas informacion tocante certificacion di diploma.
Kico ta certificacion (waarmerken) di diploma?
Certificacion di un diploma ta nifica cu un instancia ta declara (of certifica) cu e contenido di e copia ta coresponde cu e diploma original y cu esaki ta pertenece na e sistema di enseñansa (legalmente) reglamenta di e pais.
Cua instancia ta certifica (waarmerk) diploma obteni na Aruba?
Dienst Inspectie van het Onderwijs ta certifica diploma(nan) obteni na Aruba y cu ta pertenece na e sistema di enseñansa legalmente reglamenta na Aruba.
Dienst Inspectie van het Onderwijs ta ubica na John F. Kennedy Education Center.
Aki por haya: Mapa di e compleho John F. Kennedy Education Center
Horario: 8.00 – 12.00 / 1.00 – 4.00.
Cua instancia ta certifica (waarmerk) diploma obteni den exterior?
Normalmente e instituto educacional na unda a obtene e diploma ta certifica e validez di e diploma. Pa e motibo aki ta consehabel pa tuma contacto cu e instituto na unda a obtene e diploma.
Kico mester trece pa por laga certifica (waarmerk) un diploma?
- Bo mes mester haci copia di bo diploma y copia di bo cijferlijst.
- Pa evita bruhamento entre e documentonan original y e copianan, ta recomenda pa saca copia di diploma y cijferlijst riba papel A4 normal den preto-blanco. Dus preferibel no saca copia na color riba cartolina.
- Bo mester tin e originalnan cu bo pa e copianan por wordo certifica.
- Dienst Inspectie van het Onderwijs ta certifica solamente diploma y cijferlijst oficial. Ningun certificado di curso ta wordo certifica.
- E copia mester ta identico na e original (si e diploma ta om en om, e copia tambe mester ta om en om) pero den preto cu blanco (si e scol a stempel riba e copia bo mester haci copia di nobo paso e mester ta identico cu e original).
- EPI unit Economie mester tin tur 4 cijferlijst: original y copia.
- Den caso cu ta un GED-diploma mester laga certifica esaki tambe hunto cu e transcript.
- Pa diplomanan internacional p.e. di USA, Canada, Costa Rica, Colombia, etc. Dienst Inspectie van het Onderwijs lo investiga si e estudio concerni tin acreditacion cu ta worde acepta na Aruba. Den caso cu e estudio no tin un acreditacion, lo mester acudi na un notaris.
Por fabor tene na cuenta cu Dienst Inspectie no ta saca copia.
Cuanto copia por laga certifica?
- E cantidad di copia cu por wordo certifica ta 3.
- Si bo ta bay Hulanda lo por certifica 4 copia.
Info / Contact
Pa mas informacion por tuma contacto cu Dienst Inspectie van het Onderwijs
Scroll To Top
